Qalalyq polısıa departamentiniń bastyǵy qaıtys bolǵan áriptesteriniń otbasyna baryp, Qazaqstan polısıasy kúnimen quttyqtap qaıtty.
Almaty polısıasynyń basshysy qaıtys bolǵan áriptesteriniń otbasylaryna bardy, – dep habarlaıdy Almaty-akshamy.kz Polisia.kz-ke silteme jasap.
«Áriptesterimmen birge 2011 jyldyń qańtarynda qylmyskerlerdiń qolynan qaza tapqan Rıshad Ábishevtiń, sondaı-aq 2006 jyldyń kúzinde qylmystyń jolyn kesý kezinde pyshaq jaraqatyn alǵan Edil Qasymovtyń jubaılary men balalaryn merekemen quttyqtadyq. Ókinishke oraı, Táýelsizdik jyldarynda 32 almatylyq polıseı qyzmettik mindetterin oryndaý barysynda, qylmysqa qarsy kúreste qaıtys boldy. Bizdiń qasıetti boryshymyz – olardy este saqtaý jáne qurmetteý, erlikterin mura retinde urpaqtan-urpaqqa jetkizý jáne otbasylaryn barlyq jaǵynan qoldaý», – dedi Almaty qalalyq polısıa departamentiniń bastyǵy Qanat Taımerdenov.
Bas polıseı sondaı-aq, leıtenant Ábishevtiń áıeli Aıjannyń kúıeýi qaıtys bolǵannan keıin onyń jumysyn jalǵastyrýǵa bel býyp, qazaqstandyq polısıa qataryna qosylǵanyn eske saldy. Búginde eki qyzdyń anasy Alataý aýdanynyń polısıa basqarmasynda jemisti qyzmet etýde. Ol – polısıa maıory.