Dıetolog Gınzbýrg uıqysyzdyqpen kúresý úshin júzim, badam jáne jumyrtqa jeýge keńes berdi.
Medısına ǵylymdarynyń doktory, reseılik dıetolog Mıhaıl Gınzbýrg «Rossıa 1» arnasynyń «O samom glavnom» baǵdarlamasynda uıqysyzdyqty jeńýge kómektesetin ónimderdi atady, dep habarlaıdy Almaty-akshamy.kz Lenta.ru saıtyna silteme jasap.
Maman bul máseleni sheshý úshin qyzyl júzim, badam jáne jumyrtqa jeýdi usyndy.
Dıetolog qyzyl júzimdi qalypty uıqyny qamtamasyz etetin birden-bir ónim retinde atady.
«Birinshiden, júzimniń quramynda uıqy gormony retinde belgili melatonın bar», - dedi Gınzbýrg.
Dáriger melatonınniń adamnyń bıologıalyq saǵatyn retteıtin qasıeti bar ekenin túsindirdi. Sonymen qatar, gormonnyń jetkilikti mólsherde óndirilýi salmaqtyń qalypty bolýyn qamtamasyz etedi jáne gıpertonıanyń damýyna jol bermeıdi, dep qosty ol.
Uıqysyzdyqpen kúresýge kómektesetin ónimderdiń arasyna dáriger badamdy da qosqan. Gınzbýrg bul jańǵaqtyń quramynda adamdy kúızeliske ushyratpaıtyn elementter bar dep túsindirdi.
«Naqtyraq aıtsaq, magnıı tynyshtandyratyn, jasýshalyq metabolızmdi jaqsartatyn jáne jasýshalardaǵy qozý prosesterin azaıtatyn mıneral», - dep atap ótti ol.
- Jumyrtqa da uıqysyzdyqpen kúresýge kómektesedi, - deıdi maman. Onyń aıtýynsha, proteındik taǵamdar aqýyzdy qurýǵa qatysatyn amın qyshqyldarynyń biri - trıptofanǵa baı.
«Aǵzadaǵy trıptofan serotonınge - qýanysh gormonyna aınalady, serotonın keıin melatonınge aınalady», - dep qorytyndylady dáriger.
Budan buryn Gınzbýrg túngi júrek jalǵaýǵa arnalǵan eń jaqsy taǵamdardy ataǵan. Olardyń ishinde sút qyshqyldy sýsyndarymen biriktirilgen múslı, qantsyz jarma úlpekterin atady. Mamannyń aıtýynsha, eger adam birdeńe jegisi kelgen qumarlyqpen uıqyǵa jatsa, túnde ashtyq sezimi kúsheıip oıanyp ketedi, al tańerteń tamaqty artyǵymen jeı bastaıdy, bul belsendiliktiń, kóńil-kúıdiń tómendeýine ákeledi jáne jalqaýlyqqa jeteleıdi.