Qostanaı oblysyndaǵy órtten úıleri janyp ketken otbasylarǵa «Halyk Bank» 1 mln teńgeden beredi jáne nesıelerin jabady. Bul týraly atalǵan banktiń resmı Telegram arnasynda málim boldy, dep habarlaıdy Almaty-akshamy.kz Inform.kz-ke silteme jasap.
«Halyk Bank» Qostanaı oblysynda úıleri órtenip ketken ár otbasyna 1 mln teńge kóleminde qarjylaı kómek jiberedi. Úıinen aırylǵan adamdar kúsh jınap, alǵan qarajatyn eń qajettisine – turǵyn úıdi jaldaýǵa, kıim-keshek, tamaq jáne qajetti taýarlar satyp alýǵa jumsaıdy.
Sonymen qatar, bank basshylyǵy janyp ketken úılerdiń barlyq ıelerine «Halyk Bank»-tegi qoldanystaǵy kredıtterin jabý týraly sheshim qabyldady.
Bank basshylyǵy men ujymy Ozernoe, Lesnoe, Amanqaraǵaı aýyldarynyń barlyq órt saldarynan zardap shekken turǵyndaryna shynaıy janashyrlyq tanytyp, olardyń ómirleri jaqyn arada úırenshikti arnaǵa oralady degen úmitte», - dep jazylǵan banktiń Telegram arnasyndaǵy habarlamada.
Qosa ketsek, «AMANAT» partıasynyń barlyq óńirlik fılıaldarynda Qostanaı oblysyndaǵy tabıǵı apattan zardap shekkender úshin gýmanıtarlyq kómek jınaý pýktileri jumysqa kiristi. Onda birinshi kezekte qajetti taýarlar, azyq-túlik (saqtaý merzimi uzaq), jyly kıim, tazalyq quraldary qabyldanady.
Sondaı-aq, búgin órttiń saldaryn joıý máseleleri boıynsha jedel keńes ótkizgen Premer-Mınıstr Álıhan Smaıylov baspanasyz qalǵandarǵa jańa úıler salynyp beriletinin málimdedi.