Túrkıa Prezıdenti Rejep Taıyp Erdoǵan zilzala bolǵan Gazıantep provınsıasy Nýrdaǵy qalasynyń turǵyndarymen kezdesti.
Ol apat bolǵan aımaqtardy qalpyna keltirý jumystary naýryz aıynda bastalatynyn málim etti, dep habarlaıdy Almaty-akshamy.kz
Túrkıa Prezıdenti Rejep Taıyp Erdoǵan seısenbi kúni Gazıantep provınsıasynyń Nýrdaǵy qalasyna baryp, zilzala bolǵan aımaqta jańa turǵyn úıler boı kóteretinin aıtty.
«Bir jyl ishinde 11 provınsıanyń qalalarynda 200 myńǵa deıin turǵyn úı salý josparlanyp otyr. Apat aımaǵyndaǵy aýyldarda taǵy 70 myń úı salynady», - dedi Erdoǵan qala turǵyndarymen kezdesý barysynda.
Túrkıa Prezıdenti apat aımaǵyndaǵy jaǵdaı tolyq tekserilgen soń, salynatyn turǵyn úılerdiń naqty sany anyqtalatynyn atap ótti.
Aıta ketsek, sońǵy aptalarda Gazıantep provınsıasynan 87 myń turǵyn eldiń basqa aımaqtaryna evakýasıalanǵan.