Qazaqstandyq júk kólikteri Polsha men Belarýs shekarasynda turyp qaldy.
Qazaqstandyq júk tasymaldaýshylar eki kúnnen beri Belarýs pen Polsha shekarasynda tur. Polsha eýropalyq kólikterden basqa barlyq júk kólikteri úshin jalǵyz ótkizý pýnktin japqany belgili boldy, dep habarlaıdy Almaty-akshamy.kz Tengrinews.kz-ke silteme jasap.
Qazaqstandyq júk tasymaldaýshylar qazirgi jaǵdaıdy aıtty.
«Polshaǵa shekara jabyldy. Bizdiń kólikti kirgizbedi, keri qaıtardy. Men shekarada ekinshi kún boıy qozǵalyssyz júk kólikteriniń qatarynda turmyn. Biraq bul jerde tek Eýroodaq kólikterin ótkizip jatqan sıaqty. Biz turmyz, pármendi kútip, ne bolady, belgisiz. Ázirge naqty qaıtaratyny belgisiz, biraq men basshylarymnan pármen kútemin», - deıdi qazaqstandyq júrgizýshi Aleksandr Tıhonov.
20 aqpanda Polsha Úkimeti Kýkýrykı (PL) - Kozlovıchı (BY) shekaralyq ótkelinde júk tasymalyna shekteý qoıý týraly sheshim qabyldaǵany anyqtaldy.
«Shekteýler Terespoldegi shekara ótkelindegi jolaýshylar tasymalyna qoldanylmaıdy. Júk kólikterin resimdeý boıynsha shekteýler Eýropalyq Odaqqa múshe memleketterde, Eýropalyq erkin saýda qaýymdastyǵynda (EAT) - Eýropalyq ekonomıkalyq aımaq týraly kelisim taraptarynda jáne Shveısarıa Konfederasıasynda tirkelgen kólik quraldaryna qoldanylmaıdy», - delingen habarlamada.
Joǵaryda kórsetilgennen basqa aımaqtarda tirkelgen kólikter Kýkýrykıde shekaradan óte almaıtyny atap ótildi. Qozǵalysty toqtata turý 21 aqpannan bastap saǵat 19.00-den keıin arnaıy buıryq berilgenge deıin qoldanylady.
Aıta keteıik, Polsha-Belarýs shekarasynda alty baqylaý-ótkizý beketi bar. Onyń tórteýi Varshavanyń bastamasymen jumys istemeıdi. Endi besinshi tarmaq ta shekteýlerge ushyrady. Nátıjesinde tek bir ǵana Terespol-Brest núktesi ashyq, biraq ol tek avtomobılder men jolaýshylar kóligi úshin paıdalanylady.
Qazaqstandyq kólik-logıstıkalyq kompanıalar Qazaqstan Úkimetinen bul máseleni sheshýge kómektesýdi surady, sebebi bul shekteý Eýropadan/Eýropaǵa júk jetkizýdi qıyndatady.