Úıleri qashan barsań da tap-tuınaqtaı bolyp turatyn adamdar bar.
Degenmen bul jerde áńgime únemi qolynan shańsorǵysh pen shúberek túspeıtinder týraly emes. Tazalyq saqtaýda asa kóp kúsh ketirmeıtin jandar da bar.
Olar ıdi únemi derlik taza da jınaqy ustaýǵa kómektesetin birneshe ádetti ustanady. Almaty-akshamy.kz caıty Elorda.info saıtyna júgine otyryp, úıdiń shashylmaýy úshin qajetti tórt ádetti usynady.
Zatty kóp jınamaý
Keńistikti yńǵaıly etýdiń eń tıimdi joly - artyq zattan arylý. Ybyrsyǵan dúnıe joq bolsa, ony rettep jınaýdyń da qajeti joq qoı. Sondyqtan siz birinshi sómkeńizde jınalyp qalǵan chekterdi, qaǵaz qıyndylaryn jáne tólem paraqtaryn laqtyryp tastańyz. «Keıin soǵan qarap otbasy búdjetin josparlaımyn» dep óz-ózińizdi aldarqatpaı-aq qoıyńyz. Ony jasamaıtynyńyz aıdan anyq.
Ári qaraı «bir kúni túımesin qadaımyn, jyrtyǵyn jamaımyn» dep alyp qoıǵan kıimderińizdi laqtyryp tastasańyz da bolady. Óıtkeni siz muny birden jasamaǵan bolsańyz, keıin de qolyńyz bosamasy anyq.
Taza bolý men muqıat bolýdyń aıyrmashylyǵy
Úıdiń shańy qansha súrtilse de, oıynshyqtar men kıimder shashylyp jatsa, tazalyq kórinbeıdi. Asúıde ydys-aıaǵyńyz jýylyp turǵanymen, ústeldiń ústinde retsiz tursa da solaı, úıińizdiń jınalǵany bilinbeı qalady. Al kerisinshe buryshtarda sál-pál shań bolǵanymen, zattar óz ornynda tursa, siz «aınalam qopyrap tur-aý» degen mazasyzdyqtan arylasyz.
Úıdi jınaý úshin qolaıly sátti kútpeý
Sizge úıińiz otyz adam qonaq bolyp ketkendegideı kúıde bolǵansha kútýdiń qajeti joq. Bar kúsh-jigerińizdi sarp etýdiń de asa keregi shamaly. Tek qana kúndelikti birneshe ádetti qaıtalap júrseńiz jetkilikti.
Mysaly, uıqydan turǵan soń tósegińizdi jınap tastańyz, jýylǵan kıimderińizdi kepken boıda komodqa salyp qoıyńyz, úıge kelgen soń kıimińizdi shkafqa ilip jiberińiz, jýynyp bolǵan soń aınany súrtip alyńyz, sonda úıińizdegi tazalyq pen uqyptylyq uzaqqa deıin saqtalady. Ári úı jınaýǵa tolyq demalys kúnińizdi arnamaıtyn bolasyz.
Usaq-túıekke bir jáshik arnaý
Bul keńes aldyńǵy aıtqandarymyzǵa paradoks sıaqty kóringen shyǵar? Degenmen siz barlyq nárseni bir mezgilde retteı almaısyz ǵoı. Sondyqtan shashylyp jatqan nemese qajet emes zattarǵa arnalǵan bir jáshik shyǵaryp qoıyńyz. Ár apta saıyn ondaǵy zattardy iriktep, keregin qaldyryp, kerek emesin laqtyratyn bolasyz.