Mádenıet jáne aqparat mınıstrligi men «Azamattyq bastamalardy qoldaý ortalyǵy» KEAQ qoldaýymen «ÚEU Akademıasy» jobasy aıasynda Almatyda «Aqparattyq resýrstyq ortalyq» qoǵamdyq qorynyń bazasynda ÚEU belsendi ókilderine arnalǵan «joǵary» deńgeıdegi qosymsha kýrs ótti. Bul kýrs jetekshi qazaqstandyq jáne sheteldik sarapshylardyń sheberlik sabaqtaryn qamtydy, dep habarlaıdy aqshamnews.kz
Jeti kún boıy Qazaqstannyń 100-den astam komersıalyq emes uıymdarynyń ókilderi trenıńterge qatysty. Qatysýshylar arasynda aımaqtyq granttyq baıqaýlardyń jeńimpazdary men alǵashqy jobalyq ótinimderin ázirleýge daıyndalyp jatqan jańa ÚEU-dar boldy.
Qorytyndy sheberlik sabaqtaryn sheteldik trenerler ótkizdi: Lola Abdýsalámova – uıymdastyrýshylyq jáne ınstıtýsıonaldyq damý jónindegi keńesshi, Eýrazıa qory, Ortalyq Azıadaǵy azamattyq qoǵamdy qoldaý jónindegi USAID baǵdarlamasynyń ókili, jáne Damıra Toqtasynova – sarapshy, IýNFPA treneri. Olar qatysýshylarǵa áleýmettik dızaın boıynsha ádistemelik usynystar berdi. ÚEU ókilderi jobalyq ótinimderdi baǵalaý, áleýmettik jobalardy ázirleý men júzege asyrý týraly onlaın jáne oflaın rejıminde keńester alyp, suraqtaryna jaýap aldy.
«Áleýmettik dızaın neni qamtıdy?» degen suraqqa Shymkent resýrstyq ortalyǵynyń jetekshisi, qazaqstandyq trener Sara Imbarova jaýap berdi:
-Qoǵamnyń qatysýy! Áleýmettik dızaın jergilikti turǵyndardy jobalardy ázirleý men júzege asyrýǵa tartýdy qamtıdy. Bul azamattyq belsendilikti arttyryp, qoǵamnyń birligine yqpal etedi.
«ÚEU Akademıasy» jobasy qoǵam belsendilerine kedeılik, jumyssyzdyq, bilim men densaýlyq saqtaý salalaryndaǵy máselelerdi anyqtap, sheshýge kómektesetin jańa bilim beredi. Sonymen qatar, jobalar uzaq merzimdi, turaqty sheshimder usynýy tıis.
Kýrs sońynda «ÚEU Akademıasy» jobasynyń jetekshi úılestirýshisi Svetlana Pak trenıńke qatysýshylarǵa aldaǵy jarystarda sáttilik tilep, belsendi qatysýshylardy sertıfıkattarmen marapattady. Ol ÚEU-larǵa arnalǵan bul bilim berý kýrsynyń mańyzdylyǵyn atap ótip, «Azamattyq bastamalardy qoldaý ortalyǵyna» ÚEU-larǵa óz áleýetin nyǵaıtýǵa múmkindik bergeni úshin alǵys bildirdi.