Úkimettik emes uıymdardan 358 ótinim kelip túsken.
Qazaqstandaǵy 155 úkimettik emes uıymdar memlekettik grant alý maqsatynda óz ótinimderin berdi, dep habarlady Almaty-akshamy.kz.
«Aǵymdaǵy jyly 10 qańtar men 7 aqpan aralyǵynda granttar boıynsha ótinimder qabyldaý júzege asyryldy. ÚEU úshin memlekettik granttar berý konkýrsyna qatysýǵa 358 ótinim kelip tústi, onyń ishinde 155 ÚEU-dan 281 ótinim táýelsiz saraptama komısıasynyń qaraýyna jiberildi», - delingen Aqparat jáne qoǵamdyq damý mınıstrliginiń baspasóz qyzmetiniń habarlamasynda.
Óz kezeginde, granttyq qarjylandyrý salasyndaǵy operator («Azamattyq bastamalardy qoldaý ortalyǵy ortalyǵy» KEAQ) 2021 jyly qyzmetiniń tıimdiligi men sarapshylardyń sapalyq quramyn arttyrý maqsatynda Májilis depýtattary, qoǵam qaıratkerleri men akademıalyq qyzmetkerler qatarynan granttar berý qaǵıdalarynyń jańa talaptaryn eskere otyryp, sarapshylar tizilimin qalyptastyrdy. Sarapshylar tiziliminiń quramyndaǵy sarapshylar sany 15-ten 62 adamǵa deıin artty. Memlekettik jáne orys tilderin meńgergen sarapshylardyń úlesi 90% asty.
Saraptama komısıasynda turǵan barlyq sarapshylardyń biliktiligi granttyq qarjylandyrý salasyndaǵy qoldanystaǵy zańnamanyń talaptaryna sáıkes keledi.
Memlekettik granttar berýge arnalǵan konkýrs sheńberinde aǵymdaǵy jyldyń 24 qańtarynda 15 baǵyt boıynsha sarapshylar tiziliminen kezdeısoq irikteý ádisimen konkýrstyq komısıanyń sarapshylaryn irikteý ótkizildi. Sarapshylardy irikteý operatordyń áleýmettik jelilerinde tikeleı efırde kórsetildi. Kezdeısoq irikteý qorytyndysy boıynsha tizilimde turǵan 62 sarapshydan negizgi quramǵa 25 sarapshy irikteldi.