Kásipkerlik qyzmetti yntalandyrý men bıznestiń qarjyǵa qol jetkizýin qamtamasyz etý boıynsha memlekettiń saıasatyn iske asyrý maqsatynda QR Ulttyq ekonomıka mınıstrligi «Damý» kásipkerlikti damytý qorymen birlesip, 2025 jyldyń basynan bastap jalpy somasy 4 898 jobaǵa 586 mlrd teńgege qoldaý kórsetken.
Buryn aıtylǵandaı, aǵymdaǵy jylǵy sáýirde «Damý» qory arqyly kepildik berý qorlary jumysyn bastady. Munyń birinshisi 7 mlrd teńgege deıingi shaǵyn jáne orta bıznes jobalaryna, ekinshisi 7 mlrd teńgeden asatyn iri jobalarǵa arnalǵan.
Búgingi tańda 8 bankpen kelisim jasalǵan. Kepildik qoryna alǵashqy 537 mln teńge jarnany Freedom Bank salyp otyr. Sonymen qatar, Halyk Bank, ForteBank pen Bank Sentrkredıt banki tıisinshe 2 mlrd, 1,8 mlrd jáne 1,6 mlrd teńgeden úles qospaq.
SHOB-qa arnalǵan Kepildik qory ashylǵannan beri 230 jobaǵa 27,7 mlrd teńge nesıe berilgen. Bul rette kepildik somasy 13,9 mlrd teńge. Jobalardyń 70%-dan astamy jańa óndiristi iske qosýǵa, jabdyq satyp alý men qurylysqa, ınvestısıalyq maqsatqa arnalǵan. Eń kóp qoldaý kórsetilgen, shamamen 40% ótinim óńdeý ónerkásibine tıesili. Sondaı-aq, kólik jáne logıstıka, densaýlyq saqtaý men bilim berý salasynda da suranys joǵary deńgeıde.
Kepildik berý boıynsha 2025 jyldyń basynan beri «Damý» qory jalpy somasy 256 mlrd teńge, jalpy kepildik somasy 178 mlrd teńgege 2 017 jobaǵa qoldaý kórsetti.
Paıyzdyq mólsherlemelerdi sýbsıdıalaýdan SHOB sýbektilerine jeńildikpen nesıe berýge kóshý sheńberinde bıyl qarjy kólemin 750 mlrd teńgege deıin ulǵaıtý kózdelip otyr. Bul 2024 jylǵy kórsetkishten úsh esedeı artyq. Sondaı-aq, sońǵy qaryz alýshy úshin syıaqy mólsherlemesi jyldyq 12,6% jańa baǵdarlama iske qosylmaq. Ol boıynsha óńdeý ónerkásibi, týrızm, bilim berý, densaýlyq saqtaý, kólik jáne logıstıka sıaqty basym sektordaǵy jobalarǵa qarjy bólinedi.
Búginde qoldanystaǵy jeńildikpen nesıe berý baǵdarlamasyna saı, 755 jobaǵa 53 mlrd teńge qoldaý kórsetilgen.
Bul rette mıkro jáne shaǵyn bızneske beriletin 200 mln teńgege deıingi nesıeniń syıaqy mólsherlemesiniń bir bóligin sýbsıdıalaý saqtalady. Osy arqyly ekonomıkanyń basym salasyndaǵy shaǵyn kásiporyndarǵa kómek jasalmaq.
Búgingi tańda syıaqy mólsherlemesiniń bir bóligin sýbsıdıalaý boıynsha 2 126 jobaǵa 276 mlrd teńge berildi. Qarajattyń negizgi bóligi biryńǵaı keshendi baǵdarlama sheńberinde basym salany qoldaýǵa jumsaldy: óńdeý ónerkásibindegi 595 jobaǵa 90,8 mlrd. teńge, kólik jáne qoımalaýda 576 jobaǵa 52,8 mlrd.teńge, bilim berýde 158 jobaǵa 28,5 mlrd. teńge nesıe bólingen.