10 kolej halyqaralyq tájirıbe almasýda
Memleket basshysy jarıalaǵan Jumysshy mamandyqtar jyly aıasynda qazaqstandyq kolejderdi ınternasıonaldandyrý júrgizilýde. Bul – TjKB júıesin transformasıalaýdaǵy basym baǵyttardyń biri, dep habarlaıdy QR Oqý-aǵartý mınıstrliginiń baspasóz qyzmeti.
Qazirgi ýaqytta salalyq vedomstvo sheteldik seriktestermen kelissózder júrgizýde. Olardyń qatarynda Qytaı, Ońtústik Koreıa, Fransıa sekildi elderdiń jetekshi bilim berý uıymdary men kásiporyndary bar. Yntymaqtastyq aıasynda akademıalyq utqyrlyqqa, taǵylymdama men tájirıbe almasý baǵdarlamalaryna, halyqaralyq bilim berý standarttaryn, qos dıplom alý baǵdarlamalaryn engizýge, sondaı-aq pedagogterdiń kásibı quzyrettiligin arttyrýǵa erekshe kóńil bólinýde.
«Jumysshy mamandyqtarynyń jyly aıasyndaǵy negizgi is-sharalardyń biri – kolejderdi ınternasıonaldandyrý. Basty maqsat – olardyń básekege qabilettiligin arttyrý, oqý baǵdarlamalaryn halyqaralyq standarttarǵa sáıkestendirý jáne zamanaýı eńbek naryǵynyń syn-qaterlerine jaýap bere alatyn mamandardy daıarlaýǵa jaǵdaı jasaý», – deıdi Tehnıkalyq jáne kásiptik bilim departamentiniń dırektory Áset Muhanbetov.
Osy bastama aıasynda 2025 jyly elimiz boıynsha 10 kolej ınternasıonaldandyrylady. Olardyń qatarynda – N.Bekbosynov atyndaǵy Mańǵystaý energetıkalyq koleji, Astana qalasynyń qoǵamdyq tamaqtaný jáne servıs koleji, Shymkent qalasynyń jeńil ónerkásip jáne servıs koleji jáne basqalary bar. Búginde osy uıymdardyń stýdentteri men pedagogteri Japonıa, Fransıa, Qytaı, Túrkıa jáne basqa elderdiń kolejderinde jáne seriktes kásiporyndarynda oqýdan jáne taǵylymdamadan ótýde.