Bıylǵy negizgi UBT-ǵa ótinish qabyldaý 12 sáýirde bastalady.
Ǵylym jáne joǵarǵy bilim mınıstrliginiń málimetinshe, negizgi UBT-ǵa ótinish 12-25 sáýir aralyǵynda qabyldanady, dep habarlaıdy aqshamnews.kz
Onyń ishinde 12-18 sáýir aralyǵynda bir ret ótinish berýge, 19-25 sáýir aralyǵynda bir nemese eki ret ótinish berýge bolady. Testileýdiń ózi 16 mamyrda bastalyp, 5 shildege deıin jalǵasady. Talapkerler negizgi UBT-ny eki ret tapsyryp, eń úzdik nátıjemen grant konkýrsyna qatysa alady, - delingen vedomstvo habarlamasynda.
UBT-ǵa qatysý úshin Ulttyq testileý ortalyǵynyń saıty nemese UTO.kz qosymshasy arqyly ótinish berýge bolady. Talapkerler testileý kúnin, ýaqytyn jáne pýnktin ózderi tańdaıdy. Bul rette olar eki múmkindik úshin beıindik pánderdiń bir ǵana kombınasıasyn belgileıdi.
Talapkerlerdiń negizgi UBT-ǵa daıyndyǵyn jaqsartý maqsatynda engizilgen ár pán boıynsha jeke taqyryptyq taldaý bar. Iaǵnı ár UBT-dan keıin (qańtar, naýryz) túlekterge jeke taqyryptyq taldaý boıynsha bilimin arttyrý usynylady. Sonymen qatar birinshi múmkindikti tapsyrǵannan keıin olar ekinshi múmkindikke deıin daıyndyqtaryn jaqsarta alady. Odan bólek onlaın baıqaý synaqtary iske qosylǵan. Oqý jylynyń basynda UTO saıtynda test tapsyrmalary qurastyrylǵan oqýlyqtar tizimi men test jospary; "Qazaqstan tarıhy" jáne "Dúnıejúzi tarıhy" pánderi boıynsha 100 tarıhı data tizimi; "Informatıka" páninen termınder tizimi; "Qazaq ádebıeti" jáne "Orys ádebıeti" boıynsha ádebı shyǵarmalar tizimi jarıalandy.
UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý boıynsha. UBT tapsyrmalarynyń sany – 120. Onyń ishinde "Qazaqstan tarıhynan" 20 tapsyrma, "Oqý saýattylyǵynan" 10 tapsyrma, "Matematıkalyq saýattylyqtan" 10 tapsyrma jáne eki beıindik pán boıynsha 40 tapsyrmadan. Joǵary bal – 140.
Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.
Akademıalyq adaldyqty qamtamasyz etý maqsatynda UBT-ǵa qatysýshy ár adam jeke jasalǵan test nusqasyn alady. Emtıhan kezinde testileý baǵdarlamasynda kálkýlátor, hımıalyq elementterdiń perıodtyq júıesi jáne tuzdardyń erigishtik kestesi qoljetimdi bolady. Sonymen qatar talapkerlerge yńǵaıly bolý úshin kestelerdiń qaǵaz nusqalary da beriledi.