Qazaqstandaǵy yqpaldy Amanat partıasynyń depýtattary jaqynda áleýmettik jelilerde beınerolık jarıalady. Onda olar memleket boıynsha biryńǵaı ýaqyt beldeýin engizýdi qaıta qaraýǵa shaqyrdy. Birneshe óńirge bul ózgerister keleńsizdik ákelgenin aıtty. Kelesi Úkimet saǵatynda bul suraqty talqylaýǵa shyǵarýǵa daıyn ekendikterin bildirdi. Taspanews.kz korespondenti Rınat Zaıytovpen habarlasyp, sheshim olardyń qatysýynsyz qabyldanǵanyn jáne májilis depýtattaryna pikir bildirýge múmkindik berilmegenin bildi.
«Yńǵaısyz ýaqyt»
Ýaqyt beldeýin qaıta qaraýǵa bastama kótergender qatarynda Rınat Zaıytovpen birge Nurtaı Sabılánov, Ulyqbek Tumashınov, Maqsat Tolyqpaev, Samat Nurtaza jáne Gúldara Nurymova bar. Olar óz derekterinde biryńǵaı ýaqyt beldeýi tek Qostanaı, Qyzylorda, Batys Qazaqstan oblysy turǵyndary úshin ǵana qolaıly ekenin aıtty. Alaıda, qarama-qaıshylyqtar da baryn jetkizdi. Máselen, Soltústik Qazaqstan, Ońtústik Qazaqstan, Pavlodar, Abaı oblystary jáne Jetisý óńirlerinde aıtarlyqtaı keleńsizdikter týǵan. Bul óńirlerde tańǵy saǵat úsh jarymda kún shyǵyp, keshki saǵat besterde batyp ketedi.
«Ekinshi, úshinshi aýysymda oqıtyn oqýshylar ne istemek?» — dep depýtattar halyqtyń sózin sóıledi.
Osylaısha, Úkimet bul jańa usynysty qaraýǵa ýáde berdi. Vıse-premer Tamara Dúısenova sheshim qabyldanǵannan beri bir jyl ótpese de, depýtattar keltiretin dálelder qarastyrylatynyn aıtty.
Májiliste talqylanbaǵan suraq
Rınat Zaıytov Taspanews.kz tilshisine ýaqyt beldeýin aýystyrý Qazaqstannyń keı oblystarynda yńǵaısyzdyq týǵyzǵanyn aıtty.
«Sol oblystarda turyp jatqan halyqtyń kúndelikti tirshiliginiń yrǵaǵy buzylyp otyr. Ózgertpese bolmaıdy ony. Biraq, ádettegi «estýshi úkimetimiz» taǵy oılaný kerek dep jatyr. Bul keshe ǵana kóterilgen másele emes. Sheshimin tappaǵan soń, bir top depýtat — biri Abaı oblysynyń, biri Shyǵys Qazaqstan oblysynyń ókilderimen birigip, bastama kóterdik», — dedi ol.
Ol bul máselede sońǵy sóz Úkimet tarapynan ekenin aıtty.
«Bul solardyń qaýlysy ǵoı. Ony Parlament qabyldaǵan joq qoı, ýaqytty aýystyrýdy», — dedi májilis depýtaty.
Ol sózinde máseleni talqylaýǵa «erteń bolsa da daıyn» ekenin aıtty.
«Tek Úkimettiń jaýabyn kútip otyrmyz, talqylaý qashan bolatyny týraly. Qazir arnaıy fraksıa bar, bizde kelissóz júrgizetin, májilistiń apparaty bar. Solar ýaqytyn belgileıdi. Ary ketse, osy aıdyń ishinde talqylaý bolýy kerek», — dedi Rınat Zaıytov.
Ol talqylaýǵa áriptesterimen birge tıanaqty daıyndalǵanyn aıtty. Ekologtan bastap, ýaqyt máselesi boıynsha mamandar men dárigerlerden dálelder jınaǵandaryn, olardyń ýájderin keltirý ǵana qalǵanyn jetkizdi.
«Úkimettiń óziniń ýáji bar. Biraq onda eshqandaı negizdeme joq. Ekonomıkamyz ósedi degen, qaıda?» — dedi ol.
Ol engizilgen ózgerister burynyraqta Májiliste talqylanbaǵandyqtan, óz kelispeýshiligin bildire almaǵanyn túsindirdi.