Almaty-akshamy.kz saıtynda búgin jarıalanǵan jańalyqtarǵa sholý – kún kerýeni
Kúnara jer qozǵalatyn boldy
Almatyda 2 bal kóleminde jer silkinisi sezildi. Seısmologıalyq zertteý ınstıtýtyna qarasty seısmıkalyq stansalar jelisi 6 naýryz kúni Almaty ýaqytymen 05:09 kezinde jer silkinisin tirkedi. Zilzala oshaǵy Almaty qalasynan ońtústik-shyǵysqa qaraı 266 shaqyrym jerde Qytaı aýmaǵynda ornalasqan.
Kásipker múftıge qulaq asa ma?
Degenmen elimizdiń Bas múftıi jyldaǵy ádetinshe kásipkerlerge úndeý jasady.
«Kásipkerlerdi áleýmettik mańyzy bar azyq-túlikterdiń baǵasyna múmkindiginshe jeńildik jasaýǵa úndeımin. Qoǵamdyq tamaqtaný oryndarynda aýyzashar mázirin halyqqa yńǵaıly baǵamen usyný da – saýapty istiń biri. Dúkenderde kúlli jamandyqtyń bastaýy bolǵan araq-sharap satylmasa degen tilegimizdi jetkizemiz. Sonymen qatar barsha halyqtyń ortaq ıgiligi úshin salynyp jatqan jol, kópir, mektep, meshit, medrese, balabaqsha, sport kesheni syndy mańyzdy ǵımarattarǵa az da bolsa úles qosyp, belsendilik tanytýǵa shaqyramyn» dedi QMDB Tóraǵasy.
Qazaqstandyqtar tuńǵysh ret dúnıejúzilik dodaǵa shyqpaq
Motosıkl mingen jigitterdiń aıtýly jarysy sáýir aıynda Fransıa men Belgıa jáne Japonıa trassalarynda ótedi. Qazaqstandyq klýb sapynda jergilikti sportshylardan bólek Chehıa azamattary da bar.
«Qazaqstanda motosport endi ǵana qanatyn keńge jaıyp keledi. Qazir eldiń Ońtústik jáne Batys aımaqtarynda motosportqa qyzyǵýshylar kóp. Chehıadan tájirıbeli mamandardy shaqyrtý arqyly qazaq jastaryn tárbıelesek degen maqsatymyz bar. Motosporty damyǵan Italıa, Ispanıa, Fransıa sekildi eldermen báske túsý qıyn. Degenmen úzdik úshtikten kóriný úshin komanda aıanyp qalmaıdy», - dedi komanda jetekshisi Nurǵazy Sátbaev.
Barǵandar qaıtpady
QR TJM málimeti boıynsha, jyl basynan beri elimizdiń sý aıdyndarynda muzdyń opyrylýy saldarynan 2 adam sýǵa batyp ketti, 18 adam qutqaryldy, onyń ishinde 3 bala bar. Kóktemgi, ıaǵnı muzdaǵy qaýipti kezeńniń áli alda ekenin eskerý qajet. Osy kezeńde sý aıdyndarynda áli de qansha adamnyń ómiri qıylatynyn elestetý qıyn.
500 áleýmettik tólem
2024 jylǵy qańtarda Otbasynyń sıfrlyq kartasynyń kómegimen 499 azamat SMS-ke kelisim berý arqyly Memlekettik áleýmettik saqtandyrý qorynan áleýmettik tólem alý quqyǵyn paıdalandy. Onyń ishinde 493 adam jumysynan aıyrylýy jáne bir jarym jasqa deıingi bala kútimi boıynsha 6 adam tólem aldy.
5100 sekseýil
QR Ekologıa jáne tabıǵı resýrstar mınıstrligi jáne jergilikti atqarýshy organdarynyń qoldaýymen Aral teńiziniń qurǵaǵan tabanyna 5100 sekseýil kósheti otyrǵyzyldy.
Volonterler Almaty, Talǵar, Astana, Tashkent qalalarynan jınaldy. Aralarynda tipti AQSH-tyń eki azamaty boldy. Sonymen qatar Qyzylorda oblysynyń Shıeli, Jańaqorǵan eldimekenderiniń belsendi azamattary da volonterler qatarynan kórindi.
Kredıt túsińe de kirmeıdi
Turǵyndardyń qarjy uıymdarynyń aldyndaǵy bereshegi 19 trln teńgege jetti.
«Problemalyq qaryzdary bar azamattardyń qaryz júktemesiniń ósýine jol bermeý úshin kredıtter boıynsha tólem merzimin keshiktirý 90 kúnnen asqan jaǵdaıda olarǵa kepilsiz tutynýshylyq kredıtter berýge tyıym salý jóninde norma engiziledi. Budan basqa, bankter men mıkroqarjy uıymdary úshin barlyq qoldanystaǵy (ótelmegen) tutynýshylyq kredıtter boıynsha tólem merzimin keshiktirý 90 kúnnen asqan soń syıaqy esepteýge tyıym salynady»,- dedi depýtat Únzıla Shapaq.
Almatyda qubyr jaryldy
Tólebaev pen Áıteke bı kósheleriniń qıylysynda jylý qubyrynyń jarylǵanynyń kesirinen ystyq sý men jylý berý ýaqytsha toqtatyldy.
«Almaty jylý jelileri» JSHS apattyq brıgadasy apatty dereý joıýǵa kiristi.