Qaraǵandy turǵyny bekitilmegen qudyq qaqpaǵyn basyp ótip, kóligin zaqymdap, shyǵyndy komýnaldyq kásiporyndardan sot arqyly óndirip aldy, - dep habarlaıdy almaty-akshamy.kz.
Oqıǵa ótken jyldyń mamyr aıynda órbigen bolatyn. Maıqudyq kóshesimen «Aýdı A6» kóligin júrgizip kele jatyp, kenetten lúk qaqpaǵy aýdarylyp, soqqydan dóńgelegi ushyp, taǵy da biraz jerin zaqymdaǵan.
Kólik ıesi oqıǵa ornyna jol-patrýldik polısıa qyzmetkerlerin shaqyryp, jol-kólik oqıǵasyna qatysty hattama jasatyp, jazyp alǵan. Artynsha ol keltirilgen shyǵyndy eseptetedi. Sonymen, amortızasıany esepke alǵanda shyǵyn 620 myń teńgeni quraǵan.
Qajetti qujattardy jınap, kólik ıesi №2 Qazybek bı aýdandyq sotyna talap aryzben júgingen.Aryzdanýshy Qaraǵandy qalasynyń komýnaldyq sharýashylyq, jolaýshylar kóligi jáne avtomobıl joldary bólimin, sondaı-aq «Qazaqdorstroı» JSHS men «KVINTEKstroı» JSHS-nen 620 myń teńge óndirýdi talap etken. Zardap shegýshiniń pikirinshe jol jóndeýshi jaýapkershiligi shekteýli seriktestik jol jóndeý jumystaryn durys oryndamaı, adam ómirine qaýip tóndirip, shyǵynǵa batyrǵan.
Sot is materıaldaryn zerdelep, taraptardyń túsiniktemelerin tyńdap, Qaraǵandy turǵynynyń talaptaryn ishinara qanaǵattandyrdy.
"Azamattyq kodekstiń 917-babynyń talaptaryna sáıkes, zańsyz áreketten nemese áreketsizdikten keltirilgen múliktik nemese múliktik emes zalaldy zalal keltirgen tulǵa tolyq kólemde óteýge jatady. Sot talapkerge keltirilgen zalaldyń ornyn «KVINTECconstruction» JSHS toltyrýǵa tıis degen qorytyndyǵa keldi. «Avtomobıl joldary týraly» Zańnyń 3-babynyń 19- 3 tarmaǵyna sáıkes jol jumysshylary men jol qozǵalysyna qatysýshylardyń qaýipsizdigi qozǵalysty uıymdastyrý jáne jumys alańdaryn qorshaý boıynsha sharalar qabyldaý arqyly qamtamasyz etilýge tıis. Jol jóndeýge jaýapty mekeme josparly jóndeý júrgizetin joldy tıisti qorshaýmen qorshamaǵan», - dep túsindirdi Qaraǵandy qalasy Qazybek bı aýdandyq №2 sotynyń baspasóz qyzmeti.