Soltústik Qazaqstan oblysynda polısıanyń jedel ýákilderi asa iri mólsherdegi gerbısıd urlyǵyn ashý úshin 7 eldi mekenge baryp, nátıjesinde kúdiktilerdi qolǵa túsirdi, dep habarlaıdy Almaty-akshamy.kz QazAqparatqa silteme jasap.
SQO Polısıa departamenti baspasóz qyzmetiniń málimetinshe, Taıynsha aýdany polısıa bóliminiń kezekshi bólimine aýyl sharýashylyq kásiporyndarynyń biriniń qaýipsizdik qyzmetiniń bastyǵy júgindi. Ol jalpy sommasy 34 mln teńge bolatyn gerbısıd quıylǵan 84 qoraptyń urlanǵanyn aıtqan. Ýly hımıkat qulypty buzý arqyly qoımadan urlanǵan. Qylmysty ashýǵa uıymdasqan qylmysqa qarsy kúres basqarmasynyń qyzmetkerleri jumyldyryldy. Asa mańyzdy ister jónindegi aǵa jedel ýákil aýdandyq krımınaldyq polısıa qyzmetkerimen birlesip, urlanǵan zattardyń satylýy múmkin oryndary týraly aqparatty tekserý úshin aýqymdy jumys atqardy. Úsh kúnde olar Soltústik Qazaqstan, Aqmola jáne Qostanaı oblystaryndaǵy 11 adamdy tekserdi. Nátıjesinde SQO Taıynsha aýdanynyń 22 men 32 jastaǵy eki turǵyny ustaldy. Urlanǵan gerbısıdter ustalǵandardyń biriniń týysynyń úıinen tabylyp, tárkilendi.
«Qazirgi ýaqytta kúdiktiler Aqmola oblysynda qamaýda otyr. Urlyq faktisi QR Qylmystyq kodeksiniń 188-baby 4-bóligi boıynsha Sotqa deıingi tergep-tekserýlerdiń biryńǵaı tiziliminde tirkeldi. Aýylsharýashylyq qurylymdarynyń basshylary óz nysandarynyń tehnıkalyq nyǵaıtylýyna mán berýleri qajet. Beınebaqylaý júıesi, myqty esik pen qulyptar, terezelerdegi torlar, kúzet pen basqa da qorǵaý quraldary qylmystyq qolsuǵýshylyqtardan qorǵaıdy», - deıdi SQO PD bastyǵynyń orynbasary Eńbek Sembın.