1 qyrkúıekten bastap tárbıeshilerdiń jalaqysy 30%-ǵa ósedi. Bul týraly Ortalyq kommýnıksıalar qyzmeti alańynda ótken brıfıńte Oqý-aǵartý mınıstrligi Mektepke deıingi bilim departamentiniń dırektory Natalá Jumadildaeva málimdedi, dep habarlaıdy Almaty-akshamy.kz.
Departament dırektorynyń sózinshe, sońǵy tórt jylda tárbıeshilerdiń eńbekaqysy kezeń-kezeńimen 25%-ǵa ósti.
2023 jylǵy 1 qyrkúıekten bastap mektepke deıingi mekemeler pedagogteriniń jalaqysy taǵy 30%-ǵa kóteriledi. Mundaı sharalar mektepke deıingi mekemelerge pedagogterdi tartýǵa septigin tıgizedi. Óıtkeni, ózderińiz biletindeı, búgingi kúni kadr tapshylyǵy bar, - dedi Natalá Jumadildaeva.
Sonymen qatar mektepke deıingi bilim berý uıymdaryna kezekke turýdyń biryńǵaı bazasyn engizý júzege asyrylady.
Bul qyzmetterdiń ashyqtyǵyn qamtamasyz etedi, derekterdiń biryńǵaı tizilimin qalyptastyrady jáne sybaılas jemqorlyq táýekelderin azaıtady.