Bıylǵy 24 aqpan men 24 naýryz aralyǵynda týberkýlezge qarsy kúres jalpy respýblıkalyq aılyǵy júrip jatyr. Almaty qalasynyń №7 qalalyq klınıkalyq aýrýhanasy janyndaǵy emhanada dáriger-ftızıatr Qarakóz Ótemuratova men SÓS kabınetiniń meıirbıkesi Asyl-Ajar Janǵazıeva medısına mamandyǵyna oqyp jatqan stýdentterge "Týberkýlezdi erte anyqtaý" taqyrybynda dáris oqydy.
Týberkýlez jas, áleýmettik orta tańdamaıtyn, adamnan adamǵa aýamen taralatyn kesel. Iaǵnı ókpe týberkýlezi bar adamdar jótelgende, túshkirgende aýaǵa týberkýlez bakterıalaryn jaıady. Sondaı bakterıalardyń az ǵana mólsheriniń ózi jolyndaǵysyn "jaıpap" ketýge qaýqarly. Sondyqtan adamdar ásirese, qoǵamdyq oryndarda túshkirý, jótelý ádebin de saqtaǵany abzal.
"Týberkýlez qozdyrǵyshy syrtqy ortada uzaq ýaqyt saqtalady. Mysaly, mıkobakterıalar tozańdanǵan, kógergen úı-jaılarda adam úshin qaýipti, olar jyldar boıy ómir súrýge qabiletti. Naýqas adam jótelgende qaqyryǵymen birge, túshkirgen jáne sóılegen kezde qorshaǵan ortaǵa mıllıondaǵan mıkobakterıalar bóledi. Al ony ımýnıteti tym álsiz, durys tamaqtanbaıtyn jáne gıgıenalyq tazalyq saqtamaıtyn adamdar tez juqtyryp alady", – deıdi dáriger-ftızıatr Qarakóz Ótemuratova.
Sondaı-aq ol týberkýlezge jol ashatyn maskúnemdik, temeki shegý, nashaqorlyq syndy faktorlar týraly da atap ótti.
Jalpy, bul keseldi juqtyryp almaýdyń eń durys joly – jyl mezgilderine qaramastan taza aýada múmkindiginshe kóbirek bolý, dárýmenderge baı tamaqtardy tutyný, uıqynyń durys bolýyna mán berý, jeke gıgıena erejelerin saqtaý.