Qazaqstandyq tanymal ázilkesh Tursynbek Qabatov usaq buzaqylyq jasaǵany úshin ákimshilik jaýapqa tartyldy, dep habarlaıdy almaty-akshamy.kz.
Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysyna sáıkes, Tursynbek Qabatov ÁQBtK-niń 434-babynyń 1-bóligi boıynsha aıypty dep tanyldy.
İs materıaldaryna sáıkes, Qabatov ushaq bortynda mas kúıinde ádepsiz sózder aıtqan. Sotta Qabatov óziniń stúardessalardyń nashar qyzmetine kóńili tolmaǵanyn aıtyp, olarǵa óz eskertýin bildirgeni anyqtaldy. Ol óziniń ádepsiz sóz aıtqany nemese aıtpaǵany esinde joqtyǵyn aıtqanymen, qoǵamdyq tártipti buzǵany úshin keshirim suraǵan.
Kýáger, ıaǵnı aǵa stúardessa, Qabatovtyń ushaq bortynda mas kúıinde bolǵanyn jáne ádepsiz sózder aıtyp, sol arqyly qoǵamdyq tártip pen azamattardyń tynyshtyǵyn buzǵanyn rastady. Quqyq buzýshynyń kinási kýániń aıǵaqtarymen, jolaýshyny polısıaǵa berý aktisimen, beınejazbamen jáne medısınalyq saraptama qorytyndysymen rastaldy.
ÁQBtK-niń 434-babynyń 1-bóliginiń sanksıasy boıynsha 20 AEK kóleminde aıyppul salý nemese 5-ten 15 táýlikke deıin ákimshilik qamaqqa alý kózdelgen. Sot jasalǵan is-árekettiń kólemi men sıpatyn, qoǵamǵa teris áser etetin jáne qoǵamdy syılamaýshylyqty kórsetýge baǵyttalǵan, laıyqsyz minez-qulyqtyń jalǵasýyn eskere otyryp, Tursynbek Qabatovty 5 táýlikke qamaýǵa alý jazasyn taǵaıyndady.
Qaýly zańdy kúshine engen joq, sondyqtan aıyptalýshynyń ony apelásıaǵa berý múmkindigi bar.