Almaty qalasynda QR Oqý-aǵartý mınıstrliginiń qoldaýymen oqýshylardyń XII jazǵy gımnazıadasynyń ashylý saltanaty ótti.
Bul týraly Ulttyq ǵylymı-praktıkalyq dene tárbıesi ortalyǵy málimdedi, dep habarlaıdy Almaty-akshamy.kz.
Gımnazıada qatysýshylaryna sáttilik tilegen Orta bilim berý komıtetiniń tóraǵasy Qanybek Jumashev balalar-jasóspirimder sportyn damytýdyń qanshalyqty mańyzdy ekenin atap ótti. Onyń aıtýynsha, Memleket basshysynyń qoldaýymen bizdiń oqýshylarymyz jyl saıyn halyqaralyq dodalarda jeńis tuǵyrynan kórinýde. Máselen, bir ǵana 2023-2024 oqý jylynda qazaqstandyqtar túrli halyqaralyq olımpıadalar men ǵylymı baıqaýlarda 600-den astam medaldi qanjylaǵan.
«Jas sportshylar úshin bul saıys óz sheberlikterin shyńdap, tájirıbeler jınaqtaýǵa ǵana emes, sondaı-aq jańa dostar tabýǵa úlken múmkindik beredi. Gımnazıada bizge elimizdiń talantty sportshylary men bolashaq chempıondardyń esimderin tanystyratynyna shúbásiz senemin. Barlyq qatysýshylarǵa sáttilik jáne jeńistiń bıik belesterin baǵyndyrýyn tileımin», - dedi Qanybek Jumashev.
Atap ótý kerek, sporttyq saıystar 2 maýsym-28 tamyz aralyǵynda Astana, Almaty, Shymkent qalalarynda, Aqtóbe, Qostanaı, Pavlodar, Túrkistan, Batys Qazaqstan, Shyǵys Qazaqstan, Aqmola jáne Almaty oblystarynda ótedi.
Munda eki myńnan astam oqýshy saıystyń 52 túri jáne sporttyń 23 túri boıynsha ózara básekege túsedi. Bul ústel tenısi, fýtbol, regbı, badmınton, sporttyq baǵdarlaý, korabl qurastyrý, ulttyq sport túrleri jáne t.b.