Baıqaýǵa 33 elden barlyǵy 29 kartına qatysty
«Baqyt» qazaqstandyq kórkem fılmi 72-inshi Berlın halyqaralyq kınofestıvaliniń (Berlınale) «Panorama» seksıasynda bas júlde aldy, dep habarlaıdy Almaty-akshamy.kz QazAqparatqa silteme jasap.
Senarıin qazaqstandyq jýrnalıs Ásem Japısheva jazdy, rejıser – Asqar Uzabaev, prodúseri – Baıan Maqsatqyzy.
«Panorama» seksıasy – negizgi konkýrstan keıingi salmaqty júlde jáne ol 80-inshi jyldary engizilgen. Bul konkýrstyń qazylar alqasy kınoındýstrıanyń kásipqoı mamandarynan emes, shynaıy kórermenderden quralǵan. Olar kartınany kórýdi aıaqtaǵannan keıin birden daýys beredi.
Bıyl koronavırýsqa baılanysty shekteýlerge qaramastan, «Panorama» seksıasyna engen fılmderdi 20 myńnan astam adam kórgen. Bıyl 72-inshi Berlın halyqaralyq kınofestıvaliniń atalmysh seksıasyna 33 elden barlyǵy 29 kartına qatysty.
Turmystyq zorlyq-zombylyq týraly baıandaıtyn «Baqyt» fılmi kórermender men halyqaralyq BAQ tarapynan kóptegen jyly lebiz jınaǵan. Sebebi úıdegi ozbyrlyq Qazaqstanda ǵana emes, bútin álemde ótkir turǵan másele. Senarı avtorlary Ásem Japısheva men Asqar Uzabaev materıaldardy jete jınaqtap, fılm shynaıy oqıǵalarǵa negizdelip túsirildi.
«Berlınale júldesi – bul shyndyqqa aınalǵan meniń armanym. Meniń eń asqaq tilegim – qoǵamnyń, memlekettiń jáne zańnyń áıelderge degen qatynasyn ózgertý. Bul – meniń mısıam», - dedi prodúser Baıan Maqsatqyzy.
Kartınada Qazaqstannyń shaǵyn qalasynda ómir súrip jatqan otbasy týraly, uzaq jyldarǵa sozylǵan turmystyq zorlyq-zombylyq pen mahabbatsyz ómir jaıynda baıandalady. Kúıeýi, áıeli men olardyń boıjetken qyzy – úsh negizgi keıipker turmystyq zorlyq-zombylyqtyń bar muńyn, aýyrtpalyǵyn kórsetedi.
Eske salaıyq, buǵan deıin 72-inshi Berlın halyqaralyq kınofestıvaliniń Generation (balalar men jasóspirimder týraly fılmder) konkýrstyq baǵdarlamasynyń bas júldesin rejıser Farhat Sháripovtiń qazaqstandyq «Sqema» fılmi jeńip alǵan bolatyn.