Sala mamandary tutynýshylardy qaýipsizdik sharalaryn saqtaýǵa shaqyrdy.
Tabıǵı gaz úıimizge jylý men jaılylyq syılaıtyny sózsiz. Biraq, ony uqypty ári jaýapkershilikpen paıdalaný - bizge mindet.
Almatyda kún kúrt sýytyp, aıaz bolǵan kezde, tabıǵı gazben jumys isteıtin gaz jabdyqtaryn paıdalaný kezinde jazataıym oqıǵalar jıilegen. Bul týraly Áleýmettik qyzmetter úıinde Almaty qalasy Komýnaldyq ınfraqurylymdy damytý basqarmasy mamandary, qalalyq TJD ókilderi men servıstik qyzmet ókilderiniń qatysýymen ótken keńeste aıtyldy.
«Birinshi kezekte jaýapkershilik tutynýshylardyń ózderinde bolýy tıis. Odan keıin servıstik qyzmetterge júkteledi. Gaz jabdyǵyn durys paıdalanbaǵany úshin 30-dan 100 AEK-ke deıin aıyppul tóleıdi. Tutynýshylar gaz aspaptaryna baılanysty kim qyzmet kórsetetinin bilip, jylyna bir ret tekserý júrgizýi kerek», – dep atap ótti Almaty qalasy Komýnaldyq ınfraqurylymdy damytý basqarmasy basshysynyń orynbasary Nurbol Qajın.
Mamandardyń aıtýynsha, jazataıym oqıǵalardyń edáýir bóligi qaýipsizdik erejelerin saqtamaýy saldarynan oryn alady.
«Jazataıym oqıǵalardyń basym bóligi tutynýshylardyń salǵyrttyǵynan oryn alady. Sebebi, turǵyndar murjalardyń tazalyǵyn (bitelýdi) baqylamaıdy, murjany durys qospaıdy, osyndaı sebepterden keıin onyń tutastyǵy buzylady. Sonymen qatar, gaz aspaptarynda gazdy sóndiretin avtomatıkanyń bolmaýy, olardy qaraýsyz qaldyrý, turaqty tehnıkalyq qyzmet kórsetýdi elemeý sekildi nemquraıly kózqaras ta keıde qaıǵyly oqıǵalarǵa sebep bolyp jatady. Taǵy bir sebep – tehnıkalyq qyzmet kórsetý jumystarynyń ýaqtyly oryndalmaýy, ıaǵnı, qyzmet kórsetetin kompanıalar kestege sáıkes tekserý jumystaryn júrgizý úshin mekenjaılarǵa kire almaıdy. Mine, bul da apatty jaǵdaılardyń oryn alýyn týyndatady», – deıdi Infraqurylymdy damytý basqarmasynyń lıft, gaz jáne qazandyq jabdyqtaryn baqylaý bóliminiń bas mamany Dınara Jýsanbekova.
Bas mamannyń aıtýynsha, gaz jabdyqtaryn, qazandardy, balondardy jáne qysymmen jumys isteıtin ydystardy áleýmettik ınfraqurylym obektilerinde paıdalaný qaýipsizdigi boıynsha aılyqtar jıi ótkizilip turady.
Eger úıińizde gazdyń ıisin sezseńiz, birden terezeler men esikterdi ashyp, úı-jaıdy jeldetińiz. Mundaı kezde elektr aspaptary men jaryqty qosýǵa nemese óshirýge bolmaıdy. Dereý 104 telefonyna habarlasyp, shuǵyl gaz qyzmetin shaqyrý qajet. Ony tehnıkalyq qyzmet kórsetý boıynsha servıstik kompanıaǵa qatysty basqarý organyna (PIK, MIB, PT jáne t.b.) júginý arqyly nemese túbirtekterde kórsetilgen baılanys nómirleri boıynsha naqtylaýǵa bolady. Al gazben jabdyqtaý júıeleri men gaz jabdyqtary obektileriniń qaýipsizdik talaptaryn buzý máseleleri boıynsha basqarmaǵa (Dostyq dańǵyly, 85, tel.225-14-19) jazbasha habarlama qaldyra alasyz.
Basqosýdan keıin sala mamandary jekelegen úılerdiń gaz qondyrǵylaryn tekserý boıynsha reıd júrgizdi. Reıd barysynda turǵyndarǵa gaz qondyrǵylaryn paıdalaný kezinde barynsha abaı bolýǵa, qandaı da bir olqylyq baıqaǵan jaǵdaıda dereý arnaıy servıstik qyzmet kórsetetin ortalyqtarǵa habarlasýǵa keńes berdi. Sonymen qatar, gaz aspaptaryn paıdalanýǵa arnalǵan qaýipsizdik sharalary týraly arnaıy paraqshalar taratty.