Serik Kúdebaevtyń túrmedegi sýretine baılanysty tergeý júrgiziledi
Atalǵan sýretke qatysty Qylmystyq atqarý júıesi komıtetiniń baspasóz qyzmeti túsinikteme berdi.
"Qazirgi tańda sottalǵandardyń uıaly telefondy qoldaný jáne beınebaqylaý kamerasynyń obektıvin búrkemeleý faktisi boıynsha qyzmettik tergeý taǵaıyndaldy. Qylmystyq atqarý júıesi komıteti jeke quramnyń zańdylyqty buzý máselesine qatysty túbegeıli ustanymǵa berik. Kelip túsken ár aqparat tyńǵylyqty tekseriledi. Zańbuzýshylyq naqtylanǵan jaǵdaıda qoldanystaǵy zańnama aıasynda shara qoldanylady", delingen komıtettiń resmı málimetinde.
Sondaı-aq Serik Kúdebaev pen basqalar jaıǵasqan dastarhan ústinde tártipke qaıshy keletin azyq-túlik ónimi joq ekeni de naqtylanady.
"İİM buıryǵymen bekitilgen ishki tártip erejeleri boıynsha qylmystyq atqarý júıesine qarasty mekemedegi sottalǵandar syrttan sálemdeme retinde nemese týysqandarymen kezdesken kezde azyq-túlik qabyldaýǵa quqyly. Sondaı-aq olar arnaıy bólingen orynda bos ýaqyttarynda úıden kelgen tamaqty tutyna alady. Bul talap qylmystyq atqarý júıesindegi mekemelerdiń barlyq túrine ortaq. Aldyn ala málimet boıynsha, Shyǵys Qazaqstan oblystyq qylmystyq atqarý júıesi departamentiniń №22 mekemesinde sottalǵandar týysqandarynan daıyn tamaq qabyldap alǵan. Tekserý kezinde tyıym salynǵan azyq-túlik ónimderi (alkogól ónimderi) tabylǵan joq", - delingen komıtettiń baspasóz qyzmetiniń habarlamasynda.