Saıası mańyzdy shara QR «Saılaý týraly konstıtýsıalyq» Zańyna sáıkes ótkizilip jatyr. Saǵat 7.00-den bastap Aral aýdanynyń Jetes bı, Qazaly aýdanynyń Kólaryq, Qyzylqum, Birlik aýyldarynda ornalasqan №16, 74, 78, 79, 80 saılaý ýchaskeleri ashyldy.
«Osy aýyldyń turǵyny ǵana emes, janashyr aqsaqaly retinde aýyl ákimderiniń saılaýyna erekshe mán beremiz. Prezıdent bastamasymen aýyl ákimderin tikeleı saılaýǵa múmkindik týdy. Durys boldy. İsker, belsendi azamattyń aýyl ákimi bolǵanyn qalaımyz. Sol úshin de tań sáriden erte turyp daýys berýge asyqtym», - deıdi araldyq qarıa Ermek Aqmyrzaev
Aral aýdany Jetes bı aýyldyq okrýginde 341 saılaýshy tirkelse, Kólaryq aýylynda 902, Qyzylqum okrýginde 737, Birlik aýylynda 395 saılaýshy bar.
Aýyl ákimi bolýǵa nıetti barlyǵy 12 kandıdat saılaýǵa tústi. Árbir okrýgte 3 azamat kandıdat retinde baq synap jatyr.
Eske salaıyq, jyl basynan beri Qyzylorda óńirinde 17 aýyldyń ákimi saılandy. Al, jyl sońyna deıin aımaqta taǵy 12 aýyl ákiminiń saılaýy ótkiziledi.