Depýtat Dáýlet Turlyhanovtyń balasynyń áreketi áleýmettik jelide qyzý talqyǵa tústi.
Qoǵam pikiri ártarap. Biri depýtatty ornynan ketýin kútse, ekinshi tarap depýtatqa aqarattyq shabýyl jasalyp jatyr degen pikir bildirdi, dep habarlaıdy Almaty-akshamy.kz.
Dáýlet Turlyhanov aǵamyzǵa birneshe aıdan beri aqparattyq shabýyl uıymdastyrylyp jatyr. Ony keshegi vıdeodan anyq baıqaýǵa bolady. Aǵamyzdyń ózinen ilik tappaǵan bireýler endi áýletin ańdýǵa kóshken sıaqty. Áıtpese, áldeqashan kámelet jasqa tolyp, óz kúnderin ózderi kórip júrgen balalarynyń sońynan vıdeokameramen ańdý kimge qajet boldy? Qazir osyndaı úrdis beleń alyp bara jatyr. Osylaı kete bersek bir kúni bir-birimizdi muqatý úshin balalarymyzdy ańdıtyn jaǵdaıǵa jetýimiz múmkin. Onyń sońy jaqsylyqqa aparmaıdy. Eshkim de balasyn jaman adam bolsyn dep ósirmeıdi.
Konstıtýsıa boıynsha kámeletke tolǵan ár adam óziniń qylyǵy úshin ózi jaýap beredi. Ekinshiden, adamnyń tárbıesine tek ata-ana emes, qoǵamdyq ortanyń da qatysy bar ekenin umytpaıyq. «Aınalań ury bolǵan soń, adaldan bir mal soımaısyń» dep jazyp edi marqum Esenqul Jaqypbek aǵamyz. Otyzǵa kelgen azamattyń ákesine baryp «Balań nege áıelin urady?» dep suraq qoıý bizdiń elde ǵana bar shyǵar,-dep jazdy belgili aıtys aqyny Serikzat Dúısenǵazın.
Fılologıa ǵylymdarynyń kandıdaty Serikzat Dúısenǵazınniń pikirine jazýshy, baspager Arman Álmenbet
«Bul kisi úlken saıasatta júrgen adam ǵoı, meniń bilýimshe. Ol jaqta ártúrli nárse bolady. Ara túsken adam paıda tappaıdy-aý, aǵa», -degen pikirin jazdy.
Bılik adamdaryna syn kózben qaraıtyn Dına Elgezek te depýtatqa arasha túsipti.
Depýtat Dáýlet Turlyhanovtyń ulyna qatysty beınejazbany tolyq qarap shyqtym. Vıdeoda qyzdyń ózi jigitke qaıta-qaıta urynyp júrgeni anyq kórinip tur. Shydamy túgesilgen jigit ózine soqtyǵysqan qyzdy ıterip jiberedi.
Bul beınejazbany eń birinshi Kozachkov kanaly «Turlyhanovtyń ekinshi uly da qyzdy urdy» dep súıinshileı jelige taratady, ony búkil BAQ jarıalaıdy, -dep jazdy jýrnalıs Dına Elgezek feısbýk paraqshasynda.
Eske salsaq, buǵan deıin Turlyhanovtyń uly áıelge qol kótergeni týraly jazǵan edik.