«Abaı Qunanbaıuly», «Nızamı Gándjevı», «Shyńǵys Aıtmatov» jáne «Haldýn Taner», «Toqtoǵul Satylǵan» atyndaǵy altyn medaldar, sondaı-aq estelik tabaqshalar túrkitildes memleketterdiń dostyǵyn nyǵaıtýǵa eńbegi sińgen ártisterge tabys etildi.
Saltanatty shara túrki álemi úshin ortaq Naýryz merekesi qarsańynda uıymdastyryldy, dep habarlaıdy Almaty-akshamy.kz
«Árıne, bizdiń jasaǵan jumysymyz memleketterimiz arasyndaǵy dostyǵymyzdy nyǵaıtady. Onyń keleshegi mol dep oılaımyn. Ózbekstan, Ázirbaıjan, Amerıka, tipti Japonıada konsert berdik. Ár konserttiń ózindik izi bar. Osyndaı túrkitildes uıym, memleketter men olardyń mádenı muralary halyqtyń esinde qalady. Biz de «TÚRKSOI» orkestriniń quramynda júrgenimizge óte qýanyshtymyz. Alda áli talaı josparymyz ben tyń shyǵarmalarymyz bar», - deıdi «Sazgen sazy» fólklorlyq-enografıalyq ansambliniń kórkemdik jetekshisi /Qazaqstan/ Baǵdat Tilegenov.
«Osy sátti paıdala otyryp, Dúısen Qorabaıuly bastaǵan halyqaralyq TÚRKSOI uıymyna marapatpen elep-eskerip jatqandyǵy úshin alǵys aıtqym keledi. Shaqyrtý, syı-qurmet pen marapattaryńyz úshin kóp raqmet! Men úshin kútpegen tosynsyı boldy», - dedi «Horezm» mýzykalyq drama teatrynyń dırektory /Ózbekstan/ Dınara Ibragımova.
Aıta keteıik, qazirgi tańda TÚRKSOI uıymy 350-ge tarta túrkitildes el ónerpazdarynyń basyn qosyp, Naýryz merekesine arnap eki aptalyq baǵdarlama ázirlegen. Aýqymdy shara 2022 jyldyń mádenı astanasy dep tanylǵan Býrsa qalasynda osy aıdyń sońynda qorytyndylanbaq.