Túrkıa, Ázirbaıjan, Qyrǵyzstan, Ózbekstan, Túrikmenstan jáne Qazaqstan mýzeıleri arasynda túrki mádenıetiniń halyqaralyq uıymy TÚRKSOI úzdikterdi anyqtady. Almaty qalasy mýzeıler birlestigi «Best Museum of the Turkic World» joǵary marapatqa ıe boldy. Buǵan mýzeıtanýshylardyń elimizben birge shetelde ulttyq qundylyqtar men tarıhı-mádenı murany nasıhattaý jónindegi orasan zor jumystardyń arqasynda qol jetip otyr. Bul sertıfıkatty TÚRKSOI halyqaralyq uıymynyń bas hatshysy Sultan Raev tabystady, dep habarlaıdy aqshamnews.kz
«Almaty mýzeıleri sońǵy eki jyldyń ózinde úlken jumys atqarǵanyn kórip otyrmyz. Túrki elderiniń ǵana emes, Eýropa men Azıanyń turǵyndary qazir Almaty qalasy uıymdastyrǵan biregeı kórmelerdi kóre alady. Mysaly, Stambýl, Seýl, Praga, Neapol, Vena jáne álemniń basqa qalalarynda Qazaqstan kóshpendileri týraly kóshpeli kórmeler ótkizildi. Óner men tarıhqa áýestenýshiler sizder usynǵan jádigerler men artefaktilerge tań qalysty. Osylaısha, sizder qazaq mádenıetin shetelde belsendi túrde nasıhattap, elińizge týrıserdi tartasyz jáne túrki álemindegi mýzeıdi zertteý salasyndaǵy qyzmetti damytyp kelesizder. Qala bıligi sala ókilderine buryn-sońdy bolmaǵan qoldaý kórsetip jatqanyn kórip otyrmyz», - dedi Sultan Raev marapattaý barysynda.
Aıta keteıik, Almaty qalasy mýzeıler birlestiginiń quramyna halyq Yqylas atyndaǵy halyq mýzykalyq aspaptar mýzeıi, Ahmet Baıtursynulynyń mýzeı úıi, S.Muqanov pen Ǵ.Músirepovtiń ádebı-memorıaldyq mýzeı kesheni, N. Tilendıevtiń memorıaldyq mýzeıi, mýltımedıalyq dástúrli mýzyka ortalyǵy, D.A.Qonaev mýzeıi, Raıymbek batyr mýzeı kesheni, sondaı-aq Almaty qalasynyń tarıhynyń mýzeıi kiredi. Mektep jasyndaǵy balalarǵa mýzeıge kirý tegin. Mundaı sheshimdi Almaty qalasynyń ákimi Erbolat Dosaev qabyldaǵan.
Sonymen qatar, Almaty mýzeıtanýshylary ákimdiktiń qoldaýymen Parıjde (Lývr), Seýlde, Stambýlda, Neapolde, Venada, Samarqandta, Bakýde, Ashhabadta jáne Pragada taǵylymdamadan jáne oqýdan ótti. 7 halyqaralyq kórme uıymdastyryp, seriktestik týraly 15 halyqaralyq memorandýmǵa qol qoıdy.