Almatyda jol qozǵalysy erejeleriniń saqtalýyn qamtamasyz etý jáne balalar men jaıaý júrginshilerdiń qaýipsizdigin uıymdastyrý maqsatynda profılaktıkalyq is-sharalar júrgizilýde, dep habarlaıdy aqshamnews.kz
Óńirlik komýnıkasıalar qyzmetiniń brıfıńinde Almaty qalasy Polısıa departamentiniń resmı ókili Saltanat Ázirbek jyl basynan beri qalada balalardyń qatysýymen 623 jol-kólik oqıǵasy tirkelgenin habarlady.
Saltanat Ázirbek ata-analardy balalaryna joldy durys kesip ótýdi úıretýge jáne samokattar men mopedterdi júrgizýge jol bermeýge shaqyrdy. Sonymen qatar, eresekterdiń ózderi de balalarǵa durys júrip-turýdyń úlgisin kórsetý kerektigin atap ótti.
“Árbir ata-ana kámeletke tolmaǵan balalarǵa elektrlik samokattardy, mopedterdi jáne skýterlerdi minýge ruqsat berer aldynda balanyń qaýipsizdigi, densaýlyǵy men ómiri týraly oılanǵany jón. Jasóspirim kólik júrgizý daǵdylarynsyz, qaýipsizdik normalary men jol qozǵalysy erejelerin saqtamaı, ózine de, basqalarǵa da qaýip tóndirýi múmkin. Mundaı abaısyzdyqtyń baǵasy sizdiń balańyzdyń densaýlyǵy nemese ómiri bolýy múmkin ekenin esten shyǵarmańyzdar,” - dedi ol.
Sonymen qatar, ol zańǵa sáıkes 16 men 18 jas aralyǵyndaǵy kámeletke tolmaǵandarǵa jol boıynda elektr samokattardy júrgizýge tyıym salynatynyn eske saldy. Bul úshin ÁQBtK-niń 620-baby boıynsha ákimshilik jaýapkershilik kózdelgen. Zańdy ókilder QR ÁQBtK-niń 127-baby boıynsha ákimshilik jaýapkershilikke tartylady.
Almaty polısıasy kóliktiń balamaly túrlerin basqaratyn adamdar, onyń ishinde kámeletke tolmaǵandar arasynda túsindirý jumystaryn jalǵastyrýda. Almatyda jyl basynan beri mopedterdiń qatysýymen 359 jol-kólik oqıǵasy oryn alyp, 364 adam jaraqattanyp, 6 adam qaıtys bolǵan. Elektr samokattarynyń qatysýymen 47 apat oryn alyp, 51 adam jaraqat alǵan.
Jyl basynan beri jol qozǵalysy erejelerin buzǵany úshin 15 myńnan astam moped júrgizýshileri jáne samokat tizgindegen 12 myńnan astam adam ákimshilik jaýapkershilikke tartylǵan.