Túrksib aýdanynyń 17 kóshesinde 2023 jyly ortasha jol jóndeý jumystary júrgizildi
Almaty qalasy Óńirlik komýnıkasıalar qyzmetinde ótken brıfıńte Túrksib aýdanynyń ákimi Baqytjan Aqjarov aýdanda jol ınfraqurylymy qalaı jańartylyp jatqanyna toqtaldy, dep habarlaıdy Almaty-akshamy.kz
Ortalyqsyzdandyrý aıasynda aýdan ákimdigi 40 myń m2 jol tósemine aǵymdaǵy jóndeý júrgizdi. Sondaı-aq, Qaırat shaǵyn aýdanyndaǵy turǵyn úı kesheni men mektepke kiretin 2,7 km jol qurylysy aıaqtalyp, búginde bir qabat asfált tóseldi. 2024 jyldyń ekinshi toqsanynda ınjenerlik komýnıkasıalar salynǵannan soń, qalǵan 5,3 shaqyrym jol jabdyqtalady.
Uzyndyǵy 22 km quraıtyn 17 kóshege ortasha jol jóndeý jumystary júrgizildi. Sondaı-aq aýdan ákimi jol jamylǵysyn asfálttaý jumystary aıaqtalǵan kóshelerdi atap ótti: Seıfýllın dańǵyly, Aral, Baıron, Berdiqoja, Ahmetov, Alǵabas, Súıinbaı, Shemákın, Spartak, Papanın, 13 á/q, Magnıtnyı, Pokryshkın, Fılatov, Erjanov, Grodnenskaıa, Baımaǵambetov kósheleri.
Sonymen qatar, 11 kóshede uzyndyǵy 8 km bolatyn trotýarlar salynyp, jóndeldi (Ogareva, Taraz, Pýgachev, Oboznyı, Aqyndar, Seıfýllın, Kassın, Kotelnıkov, Beısebaev, Aımaýytov, Ǵanıbet kósheleri).
«Aǵymdaǵy jyldyń sońyna deıin aýdannyń 5 negizgi magıstraldyq kóshesiniń boıynda, Rysqulov, Súıinbaı dańǵyly, Maılın, Sholohov, Aqan seri kósheleriniń boıyna estetıkalyq kelbetti jaqsartý ǵana emes, sonymen qatar kóshelerdi jınaý kezinde hımıalyq reagentterden jasyl jelekterdi saqtaýǵa arnalǵan 23 km tehnıkalyq trotýar salynady», - dep qosty aýdan ákimi.
Sonymen qatar, Rysqulova dańǵyly arqyly ótetin jer ústi jaıaý júrginshiler ótkeliniń qurylysy aıaqtalyp, Erjanov kóshesi arqyly ótetin ótkel qurylysy júrgizilýde.
Sondaı-aq, B. Hmelnıskıı kóshesin Qaırat shaǵyn aýdanynan Talǵar jolyna deıin kesip ótýge arnalǵan jobalyq-smetalyq qujattama ázirlenýde. Aıaqtalý merzimi - 2023 jylǵy jeltoqsan. Qurylys-montajdaý jumystary 2024-2025 jyldarǵa josparlanǵan.