Mamandar kelesi aıdan bastap kóshe shamdaryn ornata bastaıdy.
Osy jyldyń sońyna deıin Almatynyń Túrksib aýdanyndaǵy eski elektr jelilerin jańartý jumysy aıaqtalady. Bul týraly shahar jetekshisi Erbolat Dosaev aýdan halqymen kezdesý barasynda aıtty, dep Almaty-akshamy.kz.
«Ótken kezdesýde sizder «Qaırat», «Nurshashqan» shaǵynaýdandarynda únemi jaryqtyń sónip qalatynyn aıttyńyzdar. Onyń negizgi sebepteri jelilerdiń tozýy jáne qýattyń jetispeýi bolyp tabylady»,- dedi qala ákimi.
Erbolat Dosaevtyń aıtýynsha, oryn alǵan máselelerge baılanysty eki baǵytta jumys júrgizilip jatyr.
«Qazirgi tańda 4,2 km elektr jelisi rekonstrýksıalandy. Jyldyń sońyna deıin 11 km-ge deıin jetkizý josparlanǵan. Osylaısha, bul shaǵynaýdandardaǵy eski elektr jelilerin jańartýdy aıaqtaımyz. 2023 jyldyń I toqsanynda «Álmerek» jáne «Qaırat» shaǵynaýdandarynda osyndaı jumysty bastaımyz»,- dedi qala jetekshisi.
Onyń sózinshe, qazirgi ýaqytta jetkilikti qýatty qamtamasyz etý úshin «Tuzdybastaý» podstansıasy salynyp jatyr. Obektini 2023 jyldyń II toqsanynda paıdalanýǵa berý josparlanǵan, sodan keıin osy shaǵynaýdandardy turaqty elektrmen qamtamasyz etý máselesi tolyǵymen sheshiletin bolady.
«Osy jyldyń sońyna deıin áli jaryq júrgizilmegen 100 kóshe men tuıyq kóshelerge syrtqy jaryq ornatylady. Ol úshin kelesi aıdan bastap kóshe shamdaryn ornata bastaımyz»,- dedi ákim.