Jas Qanat shaǵyn aýdanynda Damý jáne shyǵarmashylyq ortalyǵynyń qurylysy bastalady – Erbolat Dosaev
Almaty telekomýnıkasıa jáne mashına jasaý kolejiniń jańa ǵımaraty 2025 jyldyń sońyna deıin salynyp bitedi
Almaty ákimdigi Túrksib aýdanynda bilim berý ınfraqurylymyn damytý jumysyn belsendi túrde jalǵastyryp jatyr. Bul týraly qala ákimi Erbolat Dosaev aýdan turǵyndarymen kezdesýde aıtty.
Onyń aıtýynsha, oqýshy oryndarynyń tapshylyǵyn azaıtý maqsatynda 2024 jyldyń qarasha aıynda №59 mektep-gımnazıasynyń 300 oryndyq qosalqy ǵımaratynyń qurylysy men seısmıkalyq kúsheıte otyryp kúrdeli jóndeý jumystary aıaqtaldy. Osydan keıin Chernyshevskıı kóshesindegi fılıalynyń rekonstrýksıasy bastalyp, ony bıylǵy tamyz aıynda aıaqtaý josparlanǵan.
Sonymen qatar, bıylǵy aqpan aıynda №195 mektepke 450 oryndyq qosalqy ǵımarattyń qurylysy aıaqtaldy, al ótken jyly №83 gımnazıa fılıaly qaıta jańǵyrtýdan ótti.
Bıyl jyl sońyna deıin №50 mektepte seısmıkalyq kúsheıtý arqyly kúrdeli jóndeý jumystary aıaqtalady.
Budan bólek, tórt joba boıynsha jobalyq-smetalyq qujattama ázirlenip jatyr: №198 mektepke 600 oryndyq qosalqy ǵımarat salý, №142 mektepti qaıta jańǵyrtý, №78 mektepke 450 oryndyq qosalqy ǵımarat salyp, kúrdeli jóndeý júrgizý jáne №170 mekteptiń eski ǵımaratyn buzyp, jańa qosalqy ǵımarat salý.
Ulttyq «Jaıly mektep» jobasy aıasynda, qala ákimdiginiń jobalyq keńsesiniń qoldaýymen bıyl Túrksib aýdanynda 6100 oryndyq tórt jańa mekteptiń qurylysy aıaqtalady dep boljanyp otyr.
Aıta keteıik, jalpy Almaty qalasy boıynsha 35,7 myń oqýshy ornyna arnalǵan 21 jaıly mektep jáne 2750 orynǵa jeti qosalqy ǵımarat salý josparlanǵan.
Sonymen qatar, Túrksib aýdanynda mektepke deıingi uıymdarda oryn tapshylyǵyn azaıtý jumystary jalǵasyp jatyr. Ótken jyldyń tamyz aıynda №70 mamandandyrylǵan bóbekjaı-baqshasyna seısmıkalyq kúsheıtý arqyly kúrdeli jóndeý júrgizilip, jumystar aıaqtaldy.
Bıylǵy sáýir aıynyń sońyna deıin Qaırat shaǵyn aýdanyndaǵy 260 oryndyq №192 balabaqshanyń qurylysyn aıaqtaý úshin merdiger anyqtalmaq.
2025 jyldyń qazan aıynda memlekettik saraptamanyń qorytyndysy alynǵannan keıin Álmerek shaǵyn aýdanynda 320 oryndyq jańa balabaqsha jáne Altaı-1 shaǵyn aýdanyndaǵy №119 bóbekjaı-baqshasyn qaıta jańǵyrtý jumystary bastalady. Bul jumystar kelesi jyldyń úshinshi toqsanynda aıaqtalady.
Bıyl mamyrda Jas Qanat shaǵyn aýdanynda Damý jáne shyǵarmashylyq ortalyǵynyń qurylysy bastalady. Qurylys 2026 jyldyń maýsym aıynda aıaqtalady dep josparlanyp otyr.
Sonymen qatar, 2025 jyldyń sońyna deıin Almaty telekomýnıkasıa jáne mashına jasaý kolejiniń jańa oqý ǵımaraty men jataqhanasynyń qurylysy tolyq aıaqtalady, dep sózin túıindedi Almaty ákimi.