Almatyda bıyl mamyrda Qaırat jáne Nurshashqan shaǵyn aýdandarynyń turǵyndary úshin jańa «Tuzdybastaý» qosalqy stansıasy paıdalanýǵa beriledi
Túrksib aýdanynyń turǵyndarymen kezdesý barysynda Almaty ákimi Erbolat Dosaev elektr jelilerin salý jáne jańǵyrtý baǵytynda atqarylyp jatqan aýqymdy jumystar týraly baıandady. Bul sharalar elektrmen jabdyqtaýdyń senimdiligin arttyrýǵa jáne turǵyn alaptarynda jıi bolatyn apattardy joıýǵa baǵyttalǵan.
2024 jyly Qaırat shaǵyn aýdanynda 55,5 km kabel jelileri tartylyp, 22 transformatorlyq qosalqy stansıa men 1 taratý pýnkti ornatyldy. Bul sharalar aýdannyń elektrmen qamtý sapasyn aıtarlyqtaı jaqsartyp, apattyq jaǵdaıda óshýdiń sanyn azaıtýǵa múmkindik berdi.
Buǵan qosa, 2025 jyldyń mamyryna deıin Álmerek jáne Nurshashqan shaǵyn aýdandarynda 54,5 km elektr jelileri men 16 transformatorlyq qosalqy stansıany jańǵyrtý jumystary aıaqtalady.
Qaırat jáne Nurshashqan shaǵyn aýdandary turǵyndaryn úzdiksiz elektr qýatymen qamtamasyz etý maqsatynda 2024 jyly jańa «Tuzdybastaý» qosalqy stansıasy salyndy. Nysandy paıdalanýǵa berý bıyl mamyr aıyna josparlanǵan. Qazir «Tuzdybastaý» qosalqy stansıasyn «Besaǵash» qosalqy stansıasymen baılanystyratyn 7,8 km kabel jelilerin tartý jumystary júrip jatyr. Bul jobalardyń júzege asyrylýy aýdan turǵyndaryn turaqty elektrmen qamtamasyz etedi jáne bolashaqta ınfraqurylymdy damytýǵa negiz bolady.
Jalpy, qalada ınjenerlik jelilerdi jańǵyrtý jáne qaıta qurý boıynsha keshendi sharalar qabyldanyp jatyr. Osy jumystardyń nátıjesinde 2025 jyly sýmen jabdyqtaý jelileriniń tozýy 52,9%-ǵa, sý burý jelileriniń tozýy 53,9%-ǵa, al elektrmen jabdyqtaý jelileriniń tozýy 63,3%-ǵa deıin tómendeıdi.