Túrkistan oblysy Jetisaı aýdany Alǵabas aýylyndaǵy órtten keıin medısınalyq mekemelerge úsh adam - eki eresek jáne bir bala jetkizildi, - dep habarlaıdy aqshamnews.kz tilshisi oblystyq densaýlyq saqtaý basqarmasynyń baspasóz qyzmetine silteme jasap.
Vedomstvo aqparatyna sáıkes, qazir barlyǵy reanımasıa bóliminde jatyr, jaǵdaılary aýyr, biraq turaqty.
"18 qarashada Jetisaı aýdanynda bolǵan órtke baılanysty óńirdiń medısınalyq qyzmeti zardap shekkenderge jedel túrde kómek kórsetýdi bastady. Medısınalyq mekemelerge úsh adam - eki eresek jáne bir bala jetkizildi. Barlyǵy reanımasıa bóliminde jatyr, jaǵdaılary aýyr, biraq turaqty. Naýqastarǵa ıntensıv terapıanyń tolyq kesheni júrgizilip jatyr, olardyń jaǵdaıy salalyq mamandardyń tolyq baqylaýynda", - delingen habarlamada.
Sonymen qatar, basqarma jedel medısına jelisi boıynsha kúsheıtilgen jumys tártibi engizilgenin málim etti.
"Oblystyq densaýlyq saqtaý mekemelerinen qosymsha mamandar tartylyp, qajetti dári-dármekpen jáne psıhologıalyq qoldaýmen qamtamasyz etildi. Jaǵdaı Túrkistan oblysynyń densaýlyq saqtaý basqarmasynyń baqylaýynda", - dep atap ótti oblystyq densaýlyq saqtaý basqarmasynan.
Oqıǵanyń mán-jaıy
Túrkistan oblysy Tótenshe jaǵdaılar departamentiniń málimetinshe, 18 qarashada tańerteń Jetisaı aýdanyna qarasty Alǵabas aýylyndaǵy eki qabatty jeke turǵyn úıden órt shyqqany týraly habar túsken.
"Úıde eki otbasy bolǵan, shatyr opyrylyp tústi": Zákıeva oqıǵanyń jaı-japsaryn aıtty
Oqıǵa ornyna jetken órtsóndirýshiler kelgen sátte úı tolyqtaı órtke oranǵany anyqtalǵan. Órtti sóndirý jáne barlaý kezinde úıden es-tússiz jatqan úsh adam evakýasıalanyp, jedel járdem brıgadasyna tapsyryldy.
"Úıdiń ishinen 12 adamnyń máıiti tabyldy, olardyń toǵyzy – bala", – delingen TJD habarlamasynda.
Kórshilerdiń aıtýynsha, oqıǵa bolǵan úıde qonaqtar bolǵan, sebebi aldyńǵy kúni úı ıelerinde is-shara ótken. Órt 360 sharshy metr aýmaqta tolyq sóndirildi.
Qazir oqıǵa ornynda barlyq jedel qyzmet jumys istep jatyr. Órttiń shyǵý sebebi anyqtalyp jatyr, tergeý bastaldy.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.