Túrkistan oblysy Maqtaaral aýdanynyń polısıasyna jergilikti turǵynnan onyń burynǵy jubaıy qarýmen kelip, balalarynyń kózinshe janjal shyǵarǵany týraly habarlama kelip tústi, - dep habarlaıdy aqshamnews.kz tilshisi.
Polısıa kelgen ýaqytta myltyq ustaǵan er adam júgirip shyǵyp, kórshi úıdiń aýlasyndaǵy saraıǵa tyǵyldy. Zańsyz áreketter men basqalarǵa qaýip tóndirmeý úshin aýmaq tolyǵymen qorshaýǵa alyndy.
"Polısıa qyzmetkerleriniń zańsyz áreketterdi toqtatý týraly zańdy talaptaryna qaramastan, er azamat baǵynýdan bas tartyp polıseılerdiń birin jaraqattap, oq jaýdyrdy. Shabýylǵa toıtarys berý jáne ómirge qaýip tóndiretin áreketterdiń jolyn kesý úshin polıseıler aýaǵa eskertý oqtaryn atty. Alaıda quqyqbuzýshy eskertýlerge toqtamaǵannan keıin, zańnamaǵa sáıkes tabeldik qarý qoldanyldy. Quqyqbuzýshy alǵan jaraqatynan oqıǵa ornynda qaıtys boldy", - delingen Túrkistan oblysy Polısıa departamenti taratqan resmı aqparatta.
Tekserý barysynda tirkelmegen sholaq myltyq, patrondar men gılzalar tárkilendi. Bul derek boıynsha qylmystyq is qozǵaldy.
Qazir bolǵan oqıǵanyń barlyq mán-jaıyn anyqtaý úshin qajet jedel-tergeý is-sharalary júrgizilip jatyr. Tergeý barysy Polısıa departamenti basshylyǵynyń baqylaýynda.
Tergeý múddesindegi ózge de aqparattar QR QPK-niń 201-babyna sáıkes jarıa etilmeıdi.
Budan buryn Túrkistan qalasynda 500 oryndyq tergeý ızolátory salynatyny týraly jazǵan edik.