Túrkistan oblysynda Jumysshy mamandyqtar jylyna oraı jeti baǵyt boıynsha 64 is-sharadan turatyn keshendi jospar ázirlendi. Onyń basty maqsaty – kásibı bilim berýdi damytý, jumysshy mamandyqtarynyń bedelin arttyrý jáne eńbek naryǵynyń suranysyn qamtamasyz etý.
Búginde óńirdegi 50 kolejde 47 myńnan astam stýdent 75 mamandyq boıynsha bilim alýda. Onyń ishinde 16 myńnan astamy – 38 jumysshy kásipti ıgerip jatyr. Jańa oqý jylyna bólingen 15,5 myń granttyń 9,5 myńy dál osy jumysshy mamandyqtaryna baǵyttalǵan.
Kolejderde dýaldy oqytý júıesi qarqyndy damyp keledi. Qazir 35 kolej 650-den astam kásiporynmen kelisimshart jasap, stýdentterdiń teorıany tájirıbemen ushtastyryp, óndiris oryndarynda bilimin jetildirýine jaǵdaı jasalýda.
Oblys ákiminiń orynbasary Beısen Tájibaev bul baǵyttaǵy jumystardyń mánin atap ótti:
«Biz ákimdikpen birlese otyryp, jeti baǵyt boıynsha 64 is-sharadan turatyn jol kartasyn jasadyq. Qazirgi tańda onyń 18-i júzege asty. Mektepter men kásibı baǵdar berý ortalyqtarynda 790 mamannyń shtattyq birligi bekitildi. Munyń barlyǵy jumysshy mamandyqtarynyń mártebesin kóterýge baǵyttalǵan», – dedi ol.
Óńirde jastardy jumyspen qamtýǵa arnalǵan forýmdar men jármeńkeler ótkizilip keledi. Máselen, «Adal azamat, adal eńbek, adal tabys» forýmynda júzge jýyq túlek naqty jumysqa ornalasty. Al bos jumys oryndary jármeńkesinde jumys berýshiler 1,5 myńnan astam bos oryn usyndy.
Túrkistan oblysynda bilim berý júıesi de jańarýda. «Jaıly mektep» jobasy aıasynda 29 jańa oqý orny salynýda. Bıyldyń ózinde 13 mektep paıdalanýǵa berildi, jyl sońyna deıin taǵy 16 mektep ashylady. Sonymen qatar, 115 mektep jańǵyrtýdan ótkizilip, onyń 100-inde jóndeý jumystary aıaqtaldy.
Barlyq mektepter jedel basqarý ortalyǵyna qosyldy. Onda týrnıketter, dabyl túımeleri ornatylyp, qaýipsizdik sharalary kúsheıtildi. Qazirgi tańda óńirde 67 myńnan astam pedagog eńbek etedi. Olardyń ishinde 1 200-den astamy «Bilim berýdegi 1000 kóshbasshy» jobasyna qatysyp, kópshiligi basshylyq qyzmetterge taǵaıyndaldy. Jyl sońyna deıin taǵy 16 myń muǵalimniń biliktiligin arttyrý josparlansa, ulttyq «Ustaz» platformasynda 13 myńǵa jýyq pedagog attestasıadan ótýde.
Túrkistan oblysynda jumysshy mamandyqtarynyń mártebesin arttyrý, jastarǵa jańa múmkindikter berý jáne bilim berý júıesin jańǵyrtý baǵytyndaǵy jumystar dáıekti túrde jalǵasyp keledi. Bılik ókilderiniń aıtýynsha, bul qadamdar óńirdiń áleýmettik-ekonomıkalyq damýyna tyń serpin bermek.