Aqmola oblysynda respýblıkalyq «Taza Qazaqstan» aksıasy bir jyl ishinde turaqty qoǵamdyq qozǵalysqa aınaldy. Júzdegen turǵyndar Kopa kóli men Qylshaqty ózenin, sondaı-aq óńirdiń basqa da tabıǵı aýmaqtaryn tazartýǵa belsendi qatysýda.
Mamyrda Kókshetaýda ótken #JasylChallenge fleshmobyna 200-den astam stýdent pen erikti qatysyp, aǵash kóshetterin otyrǵyzdy. Jazda jáne tamyzdaǵy plogıng sharasynda ondaǵan qap qoqys jınaldy. Senbilikterge jastarmen birge zeınetkerler men otbasylar da shyqty.
Aýdandarda da aýqymdy jumystar atqarylýda. Aqkólde bir jyldyń ishinde 130-dan astam senbilik ótip, 10 myń tonna qoqys shyǵaryldy, 500 aǵash pen 25 myń gúl egildi. Býrabaıda «Jasyl el» jasaqtary Shýche kóliniń jaǵalaýyn tazartty.
Ekologıalyq bastama óńir turǵyndary úshin ómir saltyna aınalyp keledi. «Taza Qazaqstan» – tabıǵatqa degen jaýapkershiliktiń, urpaqqa úlgi kórsetýdiń jarqyn kórinisi.