Qazaqstanda túsírílgen fılmnen kím kóbírek tabys tabady ? Kınoteatr ma, álde fılmderdí jasaushy ma? Ótken aptadan berí osy sūraq kınoındustrıyadaǵy basty talqyǵa aınaldy. Májílís deputaty Elnūr Beısenbaev írí kınoteatr jelíleríníń kassalyq túsímnen alatyn úlesín synǵa alyp, qazírgí júıe fılm óndírísíne salynǵan ınvestıtsıyanyń qaıtarymyna kedergí keltíríp otyrǵanyn málímdedí. Būl píkír kınoteatrlar men prodyuserler arasyndaǵy būrynnan bar qaıshylyqty ashyq deńgeıge shyǵarǵandaı boldy.
Jaqynda deputat kıno salasyndaǵy júıelí kemshílíkterdí atap, írí kınoteatr jelíleríníń jūmysyn ashyq synǵa aldy. Onyń aıtuynsha, eldegí kınoteatrlar prokattyń alǵashqy kúnínen bastap kassalyq túsímníń 50 paıyzyn bírden alyp otyr. Aqshamnews.kz tílshísí osy taqyryptyń mán-jaıyna úńílíp kórdí.
Deputat nege narazy?
Májílís deputaty Elnūr Beısenbaevtyń aıtuynsha, kınoteatrlar kassalyq túsímdegí úlestí paıdadan emes, jalpy tabystan alady. Al būl fılm óndírísíne ketken shyǵyn tolyq ótelmeı jatyp, negízgí tabystyń bír bólígí prokat ıeleríníń "qaltasyna" ketuge alyp keledí.
“50 paıyz – paıdadan emes, jalpy túsímnen alynady. Al fılmníń ózín-ózí aqtauy úshín onyń kassasy bólíngen byudjetten kemínde úsh ese kóp boluy kerek. Mūndaı jaǵdaı qazaqstandyq kınobıznestí tūnshyqtyryp otyr”, – dedí deputat.
Onyń sózínshe, rejısserler men prodyuserler kınoteatrlar tarapynan qysym kóruden qorqyp, ashyq shaǵymdanbaıdy. Sonymen qatar fılmderdí prokatqa shyǵaru úshín jarnama men marketıngke qosymsha tólemder talap etíletíní, típtí “kóleńkelí jarnalar” bar ekení turaly da aqparat aıtylady.
Erekshe syn memlekettík qarjyǵa túsírílgen fılmderge qatysty boldy. Deputat “Qaitadan” fılmín mysalǵa keltírdí:
- fılmníń prokattaǵy tabysy - 1 mlrd teńgeden asty;
- kınoteatrlar alǵan úles - 550 mln teńge;
- memleket bólgen qarjy - 190 mln teńge.
Deputattyń aıtuynsha, jeke kınoteatr jelílerí memleket óz ınvestıtsıyasyn qaıtarmaı tūryp-aq, bírneshe ese kóp tabys tauyp otyr.
Naryqtaǵy shoǵyrlanu máselesí
Elnūr Beısenbaevtyń deregínshe, Qazaqstandaǵy kınonaryqtyń edáuír bólígí sanauly írí jelíníń qolynda shoǵyrlanǵan:
Kinopark pen Kinoplexx - kınozaldardyń shamamen 40%-yn, Chaplin men Cinemax - írí qalalardaǵy negízgí zaldardy baqylaıdy.
Deputat būl jaǵdaıdy básekeníń shekteluí dep baǵalap, oǵan Básekelestíktí qorǵau agenttígín kıno salasyndaǵy naryqtyq qatynastarǵa nazar audaruǵa shaqyrdy.
Deputattyń píkírínshe, kınoteatrlar fılm óndírísíne ketken shyǵyn tolyq ótelmeıínshe, kassalyq túsímnen úles almauy kerek. Ol AQSh-ta qoldanylatyn “syrǵymaly shkala” júıesín mysalǵa keltírdí. Būl modelde prokattyń alǵashqy aptalarynda studıyalar kassalyq tabystyń 70-90 paıyzyn alady, keıín úles bírtíndep teńesedí.
Kınoteatrlar ne deıdí?
Al “Qazaqstan kınoteatrlar alyansy” deputattyń synymen kelíspeıdí. Alyans ókílderíníń aıtuynsha, kınoteatr bıznesí joǵary kapıtaldy qajet etetín sala.
Kınoteatrlar ǵımarattardy ūstauǵa, ekran men dybys júıesíne, kreslolarǵa, qauípsízdík ınfraqūrylymyna jáne tehnıkalyq jabdyqtardy ár 5-7 jyl saıyn jańartuǵa tūraqty túrde ınvestıtsıya salady. Būl jabdyqtardyń basym bólígí Europa men AQSh-tan shetel valyutasyna satyp alynady.
Teńge baǵamynyń auytquy men kedendík alymdardyń ósuí shyǵyndy arttyryp otyr. Soǵan qaramastan, Qazaqstandaǵy bılet baǵasy orta eseppen 2000-2500 teńge, yaǵnı Batys elderíne qaraǵanda ekí esege juyq arzan.
Kassalyq túsím qalaı bólínedí?
Qazaqstanda kınoteatrlar kassalyq túsímníń 50 paıyzyn alady. Alyans ókílderíníń aıtuynsha, būl halyqaralyq tájírıbedegí eń tómen kórsetkíshterdíń bírí.
Salystyru úshín:
Qyrǵyzstan men Ózbekstanda - 60-70%;
Reseıde - 55-70%;
Europada - 50-60%;
AQSh-ta blokbasterlerdíń alǵashqy aptasynda dıstrıbyutorlar 60–65% alady, keıín úles 50/50-ge teńesedí.
Sonymen qatar, Qazaqstanda kınoteatrlarǵa kórermenderdíń syrttan tamaq pen susyn alyp kíruíne rūqsat etílgen. Būl kınoteatrlardyń negízgí qosymsha tabys kózín aıtarlyqtaı shekteıdí.
Mausymdyq táuekel men paıda
Kınoteatr tabysy jyl boıy bírkelkí bola bermeıdí. Kórermen kóp keletín kezeń nebárí bírneshe aıǵa ǵana sozylady. Al qalǵan uaqytta zaldar bosyraq bolyp, tabys aıtarlyqtaı azayady. Osyndaı kezeńderde kınoteatrlar jaldau aqysy, jalaqy jáne kommunaldyq qyzmetter sıyaqty tūraqty shyǵyndaryn būryn jınalǵan qarjy esebínen óteuge májbúr.
Orta eseppen kınoteatrlardyń barlyq shyǵyny tabystyń 85-95 paıyzyn qūraıdy. Al taza paıda - 8-15% shamasynda.
Alyans málímetínshe, kınoteatr úlesín 50%-dan tómendetu zaldardyń shyǵynǵa ūshyrauyna, bılet baǵasynyń ósuíne, servıs pen tehnıkalyq sapanyń tómendeuíne jáne kınoteatrlardyń jabyluyna alyp keluí múmkín.
Memlekettík kıno salasyndaǵy oń ózgeríster
Keıíngí jyldary Qazaqstan kınoındustrıyasynda ílgeríleu bar. Mádenıet jáne aqparat mınıstrlígíníń málímetínshe, 2025 jyldyń mańyzdy jetístíkteríníń bírí - “Qazaqfılm” kınostudıyasyna memlekettík qoldaudyń qaıta jandanuy.
Studıya qazaq kınosynyń Altyn qoryn qalpyna keltíru jūmystaryn jalǵastyryp keledí. Keıíngí 15 jylda alǵash ret kınostudıya ǵımarattaryn jańartu jobasy jekemenshík sektordyń qatysuymen júzege asty.
Vedomstvo málímetíne saı, Ūlttyq kınony qoldau memlekettík ortalyǵy ótkízgen konkurs nátıjesínde 16 jańa joba jeńímpaz atandy. 2025 jyly prokatqa “90+1”, “Tarlan”, “Igromanka”, “Kapıtan Baıtasov”, “Qaitadan”, “Altyn adam” anımatsıyalyq fılmí jáne basqa da otandyq tuyndylar shyqty.
Otandyq fılmder AQSh, Frantsıya, Italıya, Qytaı, Reseı jáne ózge elderde ótken halyqaralyq festıvalderge qatysyp, 30-dan astam bedeldí marapatqa ıe boldy. Qazaqstan kınosynyń kúnderí 15-ten astam memlekette ūıymdastyryldy.
Osylaısha, Qazaqstan kınoındustrıyasyndaǵy qazírgí jaǵdaı ekí taraptyń da uájí bar ekenín kórsetíp otyr. Kınoteatrlar qarjylyq tūraqtylyq pen joǵary shyǵyndardy alǵa tartsa, prodyuserler men deputattar kassalyq túsímdí bóludíń qazírgí júıesí ūlttyq kınonyń damuyna kedergí keltíríp otyrǵanyn aıtady.
Būl rette basty sūraq “kím kóbírek tabys tabady?” degennen górí, “qazírgí model ūlttyq kınonyń tūraqty damuyna múmkíndík bere me?” degen máselege kelíp tíreletíndeı. Kınoteatrlardyń da, otandyq kıno óndírísíníń de múddesín eskeretín teńgerímdí sheshím tabu endí memlekettík organdar men salalyq dıalogtyń nátıjesíne baılanysty bolmaq.