Túrkistan oblysynyń polıseıleri joǵalǵan jasóspirimdi Almatydan tapty.
Jetisaı polısıa bólimine túngi saǵat 03:00 shamasynda Jylysý aýylynyń turǵyny 102 nómiri arqyly habarlasqan. Aıtýynsha, 13 jastaǵy balasy úıden belgisiz baǵytqa shyǵyp ketip, qaıta oralmaǵan. Anasy balasyn izdep júrgenine 2 táýlik bolǵan. Nátıje shyqpaǵan soń, polıseılerdiń kómegine júgingen, dep habarlaıdy Almaty-akshamy.kz Polisia.kz-ke silteme jasap.
Jetisaılyq polıseıler habarlama túse salysymen, tez arada áreket etip, oqıǵa ornyna jetti. Joǵalǵan balany tabý maqsatynda qajetti dep tanylǵan barlyq jedel izdestirý jumystaryn uıymdastyrdy. Aýdan kóshelerin tekserip, kórgen-bilgen turǵyndardan surastyrý jumystary júrgizildi. Nátıjesinde polıseıler táýlik ishinde balany Almaty qalasyndaǵy týysqanynyń úıinen tapty.
Belgili bolǵandaı, joǵalǵan bala otbasyndaǵy daý-damaıǵa baılanysty úıinen ketip qalǵan. Qazirgi tańda jasóspirim bala úıine qaıtaryldy. Ulymen aman-esen qaýyshqan ana balany izdestirýde shapshańdyqpen áreket etken polısıa qyzmetkerlerine alǵysyn aıtyp, rızashylyǵyn bildirdi.
«Meniń balam túski ýaqytta belgisiz baǵytqa shyǵyp ketip, qaıta oralmady. Ózim izdep taba almaǵan soń, polıseılerden kómek suradym. Al Jetisaı aýdanynyń polıseıleri balamdy der kezinde taýyp berdi. Polısıa qyzmetkerlerine kóp raqmetimdi aıtamyn», – dedi turǵyn.