Bilim jáne aýyl sharýashylyǵy salasynyń jumyskerlerine joǵary suranys baıqaldy.
2022 jyldyń qyrkúıek aıynda elektrondyq eńbek bırjasynda 115,6 myń bos jumys orny jáne 82,3 myń túıindeme ornalastyryldy. Ótken aımen salystyrǵanda, bos oryndar sany 3,6%-ǵa, al ózekti túıindemeler sany 12,4%-ǵa azaıdy. Jalpy, bos jumys oryndarynyń sany túıindeme sanynan 29%-ǵa asyp tústi, dep habarlaıdy Almaty-akshamy.kz.
«Qyrkúıek aıynyń qorytyndysy boıynsha, EEB-da ornalastyrylǵan túıindemeler sany 11,7 myńǵa azaıdy, olardyń basym bóligi joǵary bilikti qyzmetkerlerge tıesili. Onyń ishinde, tamyzben salystyrǵanda, bilim berý salasy mamandarynyń usynystary aıtarlyqtaı qysqardy, túıindeme sany 8,7 myńǵa azaıdy. Bul rette biliktiligi joq qyzmetkerler tarapynan usynystar sany ósti. Osy sanattaǵy izdenýshiler sany aldyńǵy aımen salystyrǵanda artyp, 2,4 myń túıindemeni qurady», – dedi «Eńbek resýrstaryn damytý ortalyǵy» AQ Basqarýshy dırektory Aleksandra Molchanovskaıa.
Sarapshy qyrkúıekte eńbek naryǵyndaǵy mamandardyń joǵary tapshylyǵy Almaty (bos oryndar sany túıindeme sanynan 7,4 myńǵa kóp) jáne Astana (5,2 myń) qalalaryna, sondaı-aq Qostanaı (6,6 myń) jáne Qaraǵandy (6,5 myń) oblystaryna tán ekenin habarlady.
Al kásiptik salalar bólinisinde bilim berý jáne tárbıe (7,5 myń), qurylys (6,1 myń) jáne óndiris (5,4 myń) salalarynyń mamandary arasynda qatty tapshylyq baıqaldy.
Qyrkúıek aıynda bilim berý salasynyń mamandary úlken suranysqa ıe boldy, olar EEB-daǵy barlyq bos jumys oryndarynyń besten bir bóliginen astamyn qurady – 24,8 myń. Bul rette keıbir óńirlerde osy salada mamandardyń jetispeýshiligi baıqalady. Osylaısha, kadr tapshylyǵy Qaraǵandy oblysynda (1,4 myń) jáne Almaty qalasynda (1,3 myń) tirkeldi.
Qyrkúıekte, ótken aımen salystyrǵanda, bos oryndar sanynyń serpini aıtarlyqtaı ózgerdi: 7 óńirde bos oryndar sany jıyntyǵynda 5,6 myńǵa ósti, al basqa 10 óńirde 10 myń bos orynǵa tómendeý baıqaldy. Bos oryndardy tómendetý boıynsha eń joǵary kórsetkishterdi Qaraǵandy (2 myń bos oryn), Almaty (1,6 myń bos oryn) jáne Atyraý oblysy (1,5 myń bos oryn) kórsetedi. Túrkistan oblysy (2,4 myń bos oryn) jáne Almaty qalasy (1,6 myń bos oryn) bos oryndar sanynyń eń kóp óskenin kórsetti.
Ótken aımen salystyrǵanda, óńirler bólinisinde izdenýshiler sanynyń serpini Pavlodar jáne Batys Qazaqstan oblystaryn qospaǵanda, barlyq óńirler boıynsha tómendegenin kórsetti. İzdenýshiler arasynda belsendiliktiń eń kóp tómendeýi Almaty oblysynda (2,7 myń túıindeme) jáne Almaty qalasynda (2,2 myń túıindeme) tirkeldi.
Qyrkúıek aıynda, ótken aımen salystyrǵanda, joǵary bilikti qyzmetkerlerge suranys 16%-ǵa nemese 6,5 myńǵa tómendep, 33,6 myń bos oryndy qurady. Bul rette biliktiligi tómen (5,1% nemese 1,5 myń) jáne biliktiligi ortasha qyzmetkerlerge (1,1% nemese 0,5 myń) suranystyń artýy baıqalady, olar boıynsha bos oryndar sany tıisinshe 31,9 jáne 50,1 myńdy qurady.
«Usynys tarapynan da osyndaı jaǵdaı baıqalady – joǵary bilikti jumyskerler arasynan izdenýshiler sany tórtten birine azaıyp, 29 myń túıindemeni qurady, ortasha bilikti jumyskerler arasynda – 8%, 26,1 myń túıindemeni qurady, al tómen bilikti jumys izdeýshiler sany 1,7%-ǵa artyp, 27,2 myń túıindemeni qurady», – dedi Aleksandra Molchanovskaıa.
Mamandarǵa suranys artqan kásibı salalardyń ishinde áleýmettik qyzmet kórsetý salasyn (19% nemese 171 bos jumys orny), ǵylym men konsaltıńti (18,5% nemese 128 bos jumys orny) jáne zań ǵylymyn (18% nemese 96 bos jumys orny) atap ótýge bolady.
Jalaqy deńgeıleri óńirlerde de, kásipter arasynda da erekshelenedi. Aldyńǵy aıdaǵydaı, bul joly da usynylatyn eńbekaqynyń eń kóp mólsheri Atyraý oblysynda baıqaldy, osy óńirde ortasha jalaqysy 764 myń teńge bolatyn 21 bos oryn ornalastyryldy.
Asa joǵary jalaqyny izdeýshiler qatarynda saqtandyrý sarapshylary jáne ǵylymı qyzmetkerler 2 mln teńge eńbekaqyny qalap, sondaı-aq qurylymdyq bólimshelerdiń basshylary men dırektorlar 1,5 mln teńgeden 2 mln teńgege deıin jalaqyǵa suranys bildirýde.
«Jalpy, qyrkúıek aıynda bos oryndar men túıindemeler sanynyń birshama tómendeýi baıqalady. Bul rette bilim jáne aýyl sharýashylyǵy salasynyń jumyskerlerine suranystyń maýsymdyq turǵydan ósýi kórinis tabýda», – dep qorytyndylady Aleksandra Molchanovskaıa.