Qazaqstannyń Qurmetti konsýldyǵy Túrkıanyń shyǵysyndaǵy Ahlat qalasynda ashyldy
Qurmetti konsýldyqtyń ashylýyna Bıtlıs provınsıasynyń gýbernatory, depýtattar, qala men aýdan merleri, provınsıanyń aldyńǵy qatarly ókilderi jáne buqaralyq aqparat quraldary qatysty, dep habarlaıdy Almaty-akshamy.kz
Ókildiktiń tusaýkeser saltanatynda Elshi Abzal Saparbekuly búgingi erekshe is-shara baýyrlas elder Qazaqstan men Túrkıa arasyndaǵy dıplomatıalyq qarym-qatynastyń mereıli 30 jyldyǵy qarsańynda ótip jatqanyn atap ótti.
Sondaı-aq strategıalyq ári senimdi nysanda qalyptasqan ekijaqty yntymaqtastyqqa nazar aýdardy.
Osy rette tarıhı mańyzy bar Ahlat qalasynda Qurmetti konsýldyqtyń ashylýy eki eldiń rýhanı-mádenı, ekonomıkalyq qarym-qatynastarynyń damýyna oń septigin tıgizetinine senim bildirdi.
Bıtlıs provınsıasynyń gýbernatory Oktaı Chagataı óz sózinde is-sharanyń ereksheligin, ıaǵnı Qazaqstannyń Qurmetti konsýldyǵy osy aımaqta tuńǵysh sheteldik ókildik bolyp sanalatynyn jetkizip, bul qadam Qazaqstan men Túrkıa arasyndaǵy yntymaqtastyqty odan ári nyǵaıtýǵa úles qosatynyn aıtty.
Qurmetti konsýl Mýaz Ergezen eki eldiń prezıdentteriniń quptaýymen joǵary laýazymǵa laıyq dep tanyǵandyǵy úshin sheksiz rızashylyǵyn bildirip, ekijaqty baılanystardyń damýyna óz úlesin qosatynyn atap ótti.
Aıta keteıik, Túrkıada Qazaqstannyń segiz Qurmetti konsýldyǵy bar. Olardyń okrýgtary retinde Alaná, Koná, Mersın, Býrsa, Kodjaelı, Hataı, Denızlı jáne Bıtlıs provınsıalary dep belgilengen. Aldaǵy ýaqytta Hataı, Koná jáne Denızlıde QR Qurmetti konsýldyqtary ashylatyny josparlanǵan.