Túrkıanyń Ystanbul qalasynda Qazaqstan stýdentteriniń quryltaıy ótti
QR Syrtqy ister mınıstrliginen málim etkendeı, sharany Qazaqstannyń Túrkıadaǵy Elshiligi men Ystanbuldaǵy Bas konsýldyǵynyń qoldaýymen «Birlik qazaq jastary» stýdentter uıymy uıymdastyrdy, dep habarlaıdy almaty-akshamy.kz.
Quryltaıdyń basty maqsaty – Túrkıada bilim alyp jatqan jáne osy jyly oqýdy bastaǵan jastardyń basyn qosyp, olarǵa baǵdar berý.
Jıynǵa Qazaqstannyń Ystanbuldaǵy Bas konsýly Nýrıddın Amanqul, qoǵam qaıratkerleri jáne qazaq dıasporasynyń belsendi azamattary qatysty.
«Stýdentterdiń basym kópshiligi Ystanbulǵa jańadan kelip jatqan jastar bolǵandyqtan Bas konsýl N. Amanqul olardy jańa oqý jylymen quttyqtap, shet elde bolý zańdaryn qatań saqtaýdy eskertti. Sondaı-aq stýdentterge konsýldyq tarapynan árdaıym qoldaý kórsetiletindigin jetkizip, aldaǵy ýaqytqa ortaq is-sharalar ótkizý máselesi talqylandy», - delingen baspasóz habarlamasynda.