Jer silkinisi aımaǵynda 50 myńnan astam shatyrlar qurylǵan
Sońǵy aqparat boıynsha, Túrkıadaǵy jer silkinisinen 9557 adam qaza tapty. Taǵy 40 myńǵa jýyǵy jaraqat alǵan. Qorshaǵan orta, ýrbanızasıa jáne klımattyń ózgerýi, mınıstrdiń málimdeýinshe, apat myń shaqyrymǵa jýyq aýmaqqa áser etken. Ol jerde shamamen 13 jarym mıllıon adam ómir súredi, dep habarlaıdy Almaty-akshamy.kz Habar-24 telearnasyna silteme jasap.
Túrkıada 7 baldan joǵary qos jer silkinisinen keıin turǵyndar aımaqta 11 302 ǵımarattyń qıraǵanyn habarlady. 5 775 nysannyń buzylǵany resmı tirkeldi. Osy ýaqytqa deıin qýattylyǵy ártúrli 684 seısmıkalyq tolqý boldy. Qaıtalanyp jatsa, turǵyndardyń qaýipsizdigin saqtaý úshin jergilikti ákimshilik- halyqqa apatty ǵımarattarǵa jaqyndamaýyn eskertti.
- 55 saǵatymyzdy aıaqtadyq. 7,7 baldan keıin biz 7,6 baldyq ekinshi jer silkinisin bastan ótkerdik. Kúres eń sezimtal jáne qarqyndy túrde jalǵasýda. Izmırdegi jer silkinisiniń 110-saǵatynda úıindi astynan sábılerimiz ben balǵyndarymyzdy alyp shyqtyq. Munda da izdestirý-qutqarý jumystaryn osy motıvasıamen tabandy túrde júrgizip jatyrmyz, - deıdi Túrkıanyń Qorshaǵan orta, ýrbanızasıa jáne klımattyń ózgerýi mınıstri Murat Kýrým.
Ókinishke qaraı, Hataı provınsıasynda eki qandasymyz úıindi astynda qalyp qoıǵan. Olar Mustafa Óztúriktiń týystary ekeni belgili boldy. Esimderi Nuraı jáne Býshra Qazaq. Tap qazir qarakózderimizge kómektesý úshin Ystambuldan bir top eriktiler shyqqan.
- Qazir Antakıaǵa (Hataıǵa) kirdik. Júk kóliginiń ishindemiz. Jyǵylǵan úıimiz bar. Úıindiniń ishinde qazaq ápkemiz ben qaryndasymyz bar. Solarǵa kómektesý úshin bara jatyrmyz. Joldar óte qıyn. Mashınalar júrmeıdi. Kómek úshin fýramen júrmiz. İshinde attar bar. Sol kómekke aparatyn. Tez ýaqytta jetýimiz kerek. Ápkemiz ben qaryndasymyz úsh kúnnen beri jyǵylǵan úıdiń astynda. Soǵan tez kómek surap otyrmyz, - deıdi Erkan Shalyshkan.
Tótenshe jaǵdaılar basqarmasynyń málimdeýinshe, jer silkinisi aımaǵynda 50 myńnan astam shatyrlar qurylǵan. Onda zilzaladan zardap shekken turǵyndar ornalastyrylmaq. Budan bólek Ystambul bırjasynyń tranzaksıalardyń ýaqytsha toqtatylǵany belgili boldy. Aıta ketken jón, DDU Eýropalyq aımaqtyq búrosy Túrkıa men Sırıadaǵy jer silkinisin 3-deńgeıdegi tótenshe jaǵdaı dep jarıalady.