Túrkıada taǵy da joıqyn jer silkinisi bolýy múmkin.
Sol eldiń belgili seısmology Nadjı Górúr osylaı deıdi, dep habarlaıdy Almaty-akshamy.kz 24.kz-ke silteme jasap.
Aıtýynsha, qaýip Ystambulǵa tónip tur. Eger jer silikinse 100 myńnan asa ǵımarat qulaýy yqtımal. Jergilikti jáne sheteldik seısmologtardyń Ystambuldy úlken jer silkinisi kútip tur degen boljamdary jıi aıtyla bastady. Túrik seısmologi Nadjı Gerordiń sózinshe, zilzalanyń 7 baldan joǵary bolý yqtımaldyǵy 60%-ten joǵary. Al, megapolıs mýnısıpalıteti basshysynyń orynbasary doktor Býgra Gókche Marmara aımaǵyndaǵy eń joǵarǵy qaýiptegi senarıdi bylaısha túsindirdi.
Býgra Gókche, Ystambul mýnısıpalıteti basshysynyń orynbasary: - Eń nashar senarı boıynsha Ystambýldaǵy Marmara jer silkinisinde 207 myń ǵımarat zaqymdanýy múmkin. Bul jaǵdaı qalamyzdyń shamamen 3 mıllıon turǵynyna tikeleı áser etedi. Biz jer silkinisine tózimdi transformasıa josparyn topyraq pen qurylys qory jaǵynan eń qaýipti aımaqtardan bastaımyz.
Ystambuldy kúshti jer silkinisine daıyndaý qajettiligin Túrkıa bıligi osy jyldyń aqpan aıynda eldiń ońtústik-shyǵysynda bolǵan zardaby kóp zilzaladan keıin qolǵa alǵan. Atap aıtqanda, qaýiptilik deńgeıine qaraı ǵımarattar suryptalyp, rezervtik alańdar naqtylandy. Buzylýy múmkin úıler anyqtalyp, birqatar nysandardyń qańqalaryn qataıtý jumystary qarqyn alyndy. Sondaı-aq birinshi kezeńde 300-350 myń sharshy metr turǵyn úı salý josparlanǵan.
Mehmet Ózhasekı, qorshaǵan orta, ýrbanızasıa jáne klımattyq ózgeris mınıstri: - Ystambulda 5,8 mıllıon táýelsiz múlik bar. Onyń 1,5 mıllıony óte qaýipti sanatta, sonyń 600 myńy birinshi kezekte buzylatyn úıler. Shynymdy aıtsam, bul úlken san. 600 myń úıdiń máselesin shuǵyl bastaýymyz qajet.
Aıtyp kelmeıtin apatqa daıyndyqty shuǵyl bastaý úshin arnaıy zań jobasy ázirlendi. Tıisti qujat parlamenttik kúzgi májilisinde talqylanbaq. Zań jobasy búrokratıalyq úrdisterdi jeńildetý jáne mámile kele almaǵan turǵyndardyń jaǵdaıyn qarastyrmaq.
Mehmet Ózhasekı, qorshaǵan orta, ýrbanızasıa jáne klımattyq ózgeris mınıstri: - Bizdiń mınıstrlik aıasynda bastalǵan bul jumys 10 kúnde aıaqtalady dep oılaımyn. Biz zań jobasyn ázirlep jatyrmyz. Parlament ashylǵanǵa deıin muny aıaqtasaq, májilistiń kezekten tys jınalysyn shaqyrtamyz. Osylaısha, Ystambuldy jer silkinisine daıyndaý úshin aldymyzda turǵan barlyq kedergilerdi eńseremiz.
Merýert Qanaǵat, tilshi: - Tarıhy tereń Ystambul, Eýropa tarıhyndaǵy alǵashqy mıllıoner-qala. Rım, Vızantıa jáne Osman ımperıalarynyń burynǵy astanasy. Qazirgi Túrkıanyń negizgi saýda, ónerkásip jáne mádenıet ortalyǵy, eldiń basty portty qalasy. Qanshama ǵasyrlyq qalada kóne ǵımarattar kóp. Bir jaǵynan olardy saqtap qalý jáne tabıǵattyń tosyn minezine daıyndalý ońaı bolmaıtyny anyq.