Qazaqstan qutqarýshylary Túrkıada kúndiz-túni jumys istep jatyr
Túrkıada denesi tabylǵan adamnyń Ádil Qadyrbekov ekeni anyqtaldy, dep habarlaıdy Almaty-akshamy.kz QR Syrtqy ister mınıstrliginiń resmı ókili Aıbek Smadıarovqa silteme jasap.
Resmı ókildiń habarlaýynsha, 8 aqpan kúni keshkisin Hataı provınsıasyna qarasty Antaká qalasynda júrgizilgen izdeý jumystarynyń barysynda Túrkıa azamaty tabyldy. Ol aman. Ony aldymen Qubylaı Keskın eken dep oılaǵan, alaıda Keskınniń týystary ony rastamady.
Búgin, 9 aqpan kúni, tańǵy 9-da izdeý-qutqarý jumystary jalǵasyp, onyń barysynda eki adamnyń denesi tabyldy. Onyń bireýi túrkıalyq Qubylaı Keskın bolyp shyqty. Ekinshi dene Ádil Qadyrbekovtiki. Ony marqumnyń týystary rastady.
«QR Syrtqy ister mınıstrligi máıitterdiń Otanyna jetkizilýine barynsha qoldaý kórsetedi. Bizdiń qutqarýshylar túrik áriptesterimen birge Mirbolat Qurmashevty izdestirý ústinde», - dedi Aıbek Smadıarov.
Osyǵan deıin Túrkıada úıindi astynan Qazaqstan azamatynyń denesi tabylǵanyn jazdyq.
Sondaı-aq Túrkıadaǵy jer silkinisinen keıin habarsyz ketken Sabına Mamadárovanyń aman-esen tabylǵanyn habarladyq.
Qazaqstan qutqarýshylary Túrkıada kúndiz-túni jumys istep jatyr.
Resmı derek boıynsha, Túrkıada zilzaladan kóz jumǵandar sany 14 myńnan asty, taǵy 63 myń 794 adam jaralanǵan.