Túrkıada 22 qańtar Ulttyq Aza tutý kúni bolyp jarıalandy.
21 qańtar, seısenbige qaraǵan túni Túrkıanyń Bolý provınsıasyndaǵy Kartalkaıa taý shańǵysy kýrortyndaǵy qonaqúıden órt shyqty, dep habarlaıdy aqshamnews.kz.
Órt 12 qabatty (basqa derekter boıynsha 11 qabatty) Grand Kartal qonaqúıinde jergilikti ýaqyt boıynsha 03:27-de bastalǵan. Qazir Túrkıadaǵy jalpyulttyq eki aptalyq mektep demalysy bastaldy jáne shańǵy maýsymynyń qyzýyna baılanysty qonaqúıde 234 adam bolǵan.
Bolý gýbernatory Abdýlazız Aıdyn aldyn ala málimet boıynsha, órttiń qonaqúıdiń tórtinshi qabatyndaǵy meıramhana aımaǵynda bastalyp, joǵarǵy qabattarǵa taraǵanyn aıtty. Qonaqúı Bolýdyń ortalyǵynan birshama qashyqtyqta ornalasqan. Órt sóndirýshilerge oqıǵa ornyna jetý úshin bir saǵattan astam ýaqyt qajet boldy.
Qutqarý jumystary tańerteńge deıin jalǵasty, qutqarýshylardyń qonaqúıdiń keıbir bólikterine ázer jetkeni habarlandy. - Qaza tapqandar sany 76-ǵa jetti, - dep habarlady ishki ister mınıstri Alı Erlıkaıa.
Zardap shekkenderdiń keıbiriniń jaǵdaıy aýyr. Qaıǵyly jaǵdaıǵa baılanysty búgin Túrkıada Ulttyq aza tutý kúni bolyp jarıalandy.
Rejep Taııp Erdoǵan, Túrkıa prezıdenti:
- Órt týraly habar jetken boıda óńirge mınıstrler men komandalarymyzdy jiberdik. Órtti sóndirýge 156 tehnıka men jeke quramnyń 428 adamy jumyldyryldy. Órttiń shyǵý sebebi men kinálilerdi anyqtaý úshin tergeý amaldary bastaldy. 4 adam ustaldy. Mundaı qaıǵyly oqıǵaǵa sebepker bolǵandar zań aldynda jaýap beredi. 22 qańtar ulttyq aza tutý kúni dep jarıalandy. Elimiz ben sheteldegi ókildikterimizde týymyz tómen túsiriledi.