2022 jylǵy 1 qarashada TÚRKSOI aıasynda Ystambul qalasynda (Túrkıa) Ahmet Baıtursynulynyń 150 jyldyq mereıtoıyna arnalǵan «Ahmet Baıtursynuly jáne túrki órkenıeti» atty ǵylymı konferensıa ótti, dep habarlaıdy Almaty-akshamy.kz.
Konferensıany QR Ǵylym jáne joǵary bilim vıse-mınıstri Eshenqulov Talǵat İlıasuly júrgizip otyrdy. T. Eshenqulov: «Ahmet Baıtursynuly – túrki halyqtaryna ortaq uly tulǵa. Onyń ilimi halyqaralyq ǵylymı keńistikte, ásirese, túrki álemindegi gýmanıtarlyq ǵylymdarda reformatorlyq ıdeıalarymen erekshelenedi», – dep atap ótti.
Konferensıaǵa Túrki memleketteri uıymynyń Bas hatshysy Baǵdat Ámireev, TÚRKSOI Bas hatshysy Sultan Raev, Halyqaralyq Túrki akademıasy prezıdentiniń mindetin atqarýshy Majıdlı Fızýlı, Qazaqstan Respýblıkasynyń Túrkıa Respýblıkasyndaǵy Tótenshe jáne Ókiletti Elshisi Erkebulan Sápıev, Qazaqstan Respýblıkasynyń Ystanbuldaǵy Bas konsýly Álim Baıel, Ystambul ýnıversıtetiniń rektory Mahmýt Ak, Ahmet Baıtursynulynyń 150-jyldyǵyna Qazaqstan – Túrkıa baǵytynda velosherý arnaǵan aýdarmashy, jýrnalıs Ernat Melsuly qatysyp, quttyqtaý sóz sóıledi. Otandyq jáne Túrkıa, Ázerbaıjan, Ózbekstan, Qyrǵyzstannan alashtanýshy, ahmettanýshy ǵalymdar baıandama jasady.
Alashtanýshy ǵalym, fılologıa ǵylymdarynyń doktory, profesor Tursyn Jurtbaı óz baıandamasynda: «Ulttyq táýelsiz sana týraly ıdeıanyń tuǵyryn Álıhan Bókeıhan saıası turǵydan qalyptastyrsa, Ahmet Baıtursynuly sonyń ıdeıalyq negizin tikeleı ornyqtyrdy dep esepteımin» dese, fılologıa ǵylymdarynyń doktory, profesor Aıgúl İsmaqova «Ahmet Baıtursynuly – otarlaýǵa qarsy turǵan Ult ustazy» atty baıandamasynda: «Jazǵan sóz janym ashyp Alashyma!» dep óziniń ómirlik ustanymyn aıqyndap alǵan Ahmet Baıtursynuly Otanǵa adal qyzmet etýdiń úlgisin kórsetip ketken biregeı ǵalym» dep atap ótti.
Sonymen qatar atalǵan konferensıada E. Bóketov atyndaǵy Qaraǵandy ýnıversıtetiniń profesory, fılologıa ǵylymdarynyń doktory Jandos Smaǵulov «Ahmet Baıtursynuly – ulttyq ádebıettaný ǵylymynyń negizin qalaýshy», A. Baıtursynuly atyndaǵy Qostanaı memlekettik ýnıversıtetiniń profesory, fılologıa ǵylymdarynyń doktory Almasbek Ábsadyq «Ustaz joly: aýyl muǵaliminen Bilim mınıstrine deıin», Ózbek memlekettik álem tilderi ýnıversıtetiniń profesory, fılologıa ǵylymdarynyń doktory (Ózbekstan Respýblıkasy) Mahanbet Júsipov «Ahmet Baıtursynuly qazaq jáne jalpy tiltanymynda til, tildesim, tildesimdik qyzmet, til materıaly ǵylymı uǵymdary konsepsıasynyń negizin qalaýshy», Q.Qarasaev atyndaǵy Bishkek memlekettik gýmanıtarlyq ýnıversıtetiniń profesory, fılologıa ǵylymynyń doktory (Qyrǵyz Respýblıkasy) Tashpolat Sadyqov «A. Baıtursynuly jáne qyrǵyz tiltanym termınologıasynyń qalyptasýy», Baký Slaván ýnıversıteti Túrkologıa kafedrasynyń dosenti, fılologıa ǵylymdarynyń doktory (Ázerbaıjan Respýblıkasy) Nýrıda Novrýzova «Ahmet Baıtursynuly jáne túrki tilderindegi termınologıa prınsıpteri týraly» taqyryptarynda baıandama jasady.
Konferensıa aıasynda Ahmet Baıtursynulynyń eńbekterin tanytýǵa arnalǵan kitap kórmesi, ult ustazynyń ómiri men qyzmetine arnalǵan fotokórme uıymdastyrylyp, «Qazaq órkenıeti jáne Ahmet Baıtursynuly» taqyrybynda beınerolık kórsetildi.
Konferensıa barysynda «Ahmet Baıtursynuly. Tańdamaly shyǵarmalary» (qazaq, túrik, aǵylshyn, orys tilderinde) kitabynyń jáne Halyqaralyq Túrki akademıasy tarapynan usynylǵan Raıhan Imahanbettiń «Ǵasyr sańlaǵy» kitabynyń tusaýkeseri ótti.