Qazaqstanda áskerı medısına qarqyndy damyp keledi
Qorǵanys mınıstrliginiń áskerı medısına ortalyǵy men áskerı-klınıkalyq gospıtali konferensıa uıymdastyryp, onda medısına mamandary aýrýlardy ýaqtyly dıagnostıkalaý jáne emdeý boıynsha tájirıbe almasty, dep habarlaıdy Almaty-akshamy.kz.
Ǵylymı forýmǵa qatysýshylarǵa Qorǵanys mınıstrliginiń Bas áskerı-medısınalyq basqarmasynyń bastyǵy medısına qyzmetiniń polkovnıgi Tımýr Oshaqbaev sóz sóıledi. Ol Qazaqstanda áskerı medısına qarqyndy damyp kele jatqanyn, al 30 jyl buryn Qarýly kúshterde qurylǵan basqarý organdary men emdeý mekemeleriniń qurylymdary áskerı qyzmetshilerdiń densaýlyǵyn saqtaýdy jáne áskerlerdiń jaýyngerlik ázirligin qoldaýdy qamtamasyz etetinin atap ótti. Sondaı-aq, el tarıhyndaǵy medısınalyq qyzmettiń jalǵyz general-maıory Talǵat Nurmaǵambetovtyń áskerı jáne azamattyq medısınanyń damýyna qosqan úlesin de aıta ketti. Tiri bolǵanda ol 27 qazanda 70 jasqa tolar edi.
Jedel klınıkalyq belgileri bar pasıentterdi dıagnostıkalaý, baǵyttaý jáne olarǵa joǵary tehnologıalyq medısınalyq kómek kórsetý máselelerin talqylaýǵa áskerı dárigerlerden basqa Almaty qalasyndaǵy emdeý mekemeleriniń ókilderi, gastroenterologtar, ınfeksıonıster, terapevtter, jalpy praktıka dárigerleri, endoskopıster, hırýrgtar jáne epıdemıologtar qatysty.
Konferensıaǵa qatysýshylar mundaı kezdesýler emdeý mekemeleri arasyndaǵy ózara is-qımyldy keńeıtýge, dárigerlik personaldyń kásibı mashyǵyn jetildirýge, medısınalyq qyzmetterdiń sapasyn arttyrýǵa yqpal etetinin atap ótti.