Túrik Taıaý Shyǵys tehnıkalyq ýnıversıtetiniń (Orta Doğu Teknik Üniversitesi, ODTÜ, METU) ǵalymdary Alsgeımer aýrýynyń qaýpin erte anyqtaýǵa múmkindik beretin jasandy ıntellekt negizindegi tehnologıany oılap tapty.
METU ýnıversıtetiniń ınformatıka ınstıtýtynyń pedagogıkalyq keńesiniń jáne neıroǵylym jáne neırotehnologıa salasyndaǵy Birikken qoldanbaly zertteýler ortalyǵynyń basqarma múshesi Eshım Aıdyn Sonnyń aıtýynsha, ol silekeıden alynǵan úlgini paıdalana otyryp, genetıkalyq testileý arqyly júzege asyrylady, dep habarlaıdy Almaty-akshamy.kz.
Ol bul jańashyldyq dárigerlerge dıagnoz qoıý kezinde aıtarlyqtaı kómek kórsetetinin atap ótti.
«Bizge 65 jastan asqan este saqtaý qabiletiniń tómendeýi sıaqty alsgeımer aýrýynyń belgileri bar adamdar keledi. Biz genetıkalyq saraptama júrgizgennen keıin dárigerler onyń nátıjesin klınıkalyq kórinispen biriktirip, sonyń negizinde dıagnoz qoıa alady», - dep túsindirdi ol.
Onyń aıtýynsha, zertteý tobynyń músheleri jasandy ıntellekt kómegimen halyqaralyq jumys toptary jasaǵan úsh aýqymdy derekter jıyntyǵyn taldaý negizinde aýrýdyń erte satysynda damý qaýpiniń ındıkatory bola alatyn genetıkalyq profılderdi anyqtaıdy.
«Biz ázirlegen ádis boıynsha synaqqa qatysýshylardan silekeı úlgileri alynyp, olardyń DNQ-sy anyqtalady. Zertteýler aýrýdyń qaýpin 1,5-2 ese arttyratyn genetıkalyq ózgeristerdi anyqtady. Bizdiń joba aıasynda molekýlalyq dıagnostıkalyq jınaqtyń prototıpi ázirlendi», - dep jalǵastyrdy ol.
Bul ádis Alsgeımer aýrýymen aýyratyn 100 naýqasqa qoldanyldy.
Ǵalym Alsgeımer aýrýyn erte dıagnostıkalaýdyń keıingi emdeýde mańyzy zor ekenin atap ótti.