Ystambulda Túrki memleketteri uıymyna qatysýshy elderdiń áleýmettik saıasat mınıstrleriniń alǵashqy kezdesýi ótti.
Oǵan Qazaqstannan Eńbek jáne halyqty áleýmettik qorǵaý vıse-mınıstri Nazgúl Saǵyndyqova qatysty, dep habarlaıdy Almaty-akshamy.kz.
Kezdesý Halyqaralyq otbasy kúnine oraılastyrylyp, «Jahandanǵan álemniń táýekelderine qarsy turý: Bizdiń otbasymyz – bizdiń bolashaǵymyz» taqyrybynda ótti.
İs-sharaǵa Ázerbaıjan, Qazaqstan, Qyrǵyzstan, Túrkıa jáne Ózbekstannan, sondaı-aq baqylaýshy elder – Túrikmenstan, Vengrıa men Soltústik Kıprden TMU-ǵa qatysýshy elderdiń birinshi basshylary men mınıstrlerdiń orynbasarlary qatysty.
Delegasıa basshylaryn Túrkıa Respýblıkasynyń Prezıdenti Rejep Taıyp Erdoǵan qabyldady. Ol kezdesýge qatysýshylardy áleýmettik qorǵaý salasyndaǵy óńirlik yntymaqtastyqtyń bastalýymen quttyqtap, birlesken jumysta tabys tiledi.
İs-shara barysynda TMU-ǵa qatysýshy elderdiń ortalyq memlekettik organdarynyń áleýmettik saıasat máseleleri boıynsha ózara is-qımyl máseleleri talqylandy.
Nazgúl Saǵyndyqova óz sózinde áriptesterin Qazaqstanda áleýmettik qorǵaý salasynda júrgizilip jatqan reformalar týraly habardar etip, túrki ıntegrasıasy tarıhynda áleýmettik saıasat boıynsha yntymaqtastyq jańa beles bolatynyn atap ótti.
Kezdesý qorytyndysy boıynsha TMU elderiniń otbasy isteri jáne áleýmettik saıasat mınıstrleriniń birinshi kezdesýiniń birlesken deklarasıasyna qol qoıyldy ári TMU Hatshylyǵy janynan turaqty jumys isteıtin áleýmettik saıasat jónindegi jumys toby quryldy.
Yntymaqtastyq sheńberinde birlesken zertteýler júrgizý jáne kelesideı baǵyttar boıynsha tájirıbe almasý josparlanýda: halyqtyń ál-aýqatyn arttyrý, halyqtyń áleýmettik osal toptaryn qoldaý, sondaı-aq otbasy ınstıtýtyn nyǵaıtý.
Áleýmettik saıasat máseleleri boıynsha syndarly yntymaqtastyq baýyrlas túrki halyqtarynyń ornyqty damýyna, «Túrki álemi – 2040» kózqarasyn iske asyrýǵa jáne TMU-ǵa múshe memleketter arasyndaǵy ıntegrasıany nyǵaıtýǵa yqpal etetin bolady.
TMU-ǵa qatysýshy elderdiń áleýmettik saıasat mınıstrleriniń ekinshi kezdesýin 2025 jyly Ázerbaıjanda ótkizý josparlanýda.