Túrki memleketteri uıymy bas hatshysynyń orynbasary, uıym atynan kelgen baıqaýshylar mısıasynyń basshysy Sadı Djafarov Qazaqstanda 19 naýryzda ótken saılaýdy uıymdastyrýǵa qatysty pikir bildirdi, dep habarlaıdy almaty-akshamy.kz .
«Mısıa músheleri baıqaýshy retinde Astana qalasyndaǵy birqatar ýchaskede boldy. Daýys berý bastalǵanǵa deıin, 17 naýryzda birneshe partıanyń ókilimen kezdesip, olardyń daıyndyǵymen tanystyq. Delegasıa partıalardyń baǵdarlarmasyna, qarjylyndyrýǵa, medıaresýrstarda aqparat taratýǵa qatysty málimetterdi talqylady. Sonymen qatar, bizdiń mısıa QR Ortalyq saılaý komısıasynyń tóraǵasy Nurlan Ábdirovpen de kezdesti. Osy oraıda ol saılaý prosesine qatysty tolyq málimet berdi», - dedi Sadı Djafarov elordadaǵy Halyqaralyq baıqaýshylarǵa qolǵabys kórsetý ortalyǵynda ótken brıfıńte.
Onyń aıtýynsha, 19 naýryz kúni Túrki memleketteri uıymy ókilderi tańerteń Astanada ashylǵan ýchaskelerde bolǵan.
«Ýchaskelerdiń ashylýy ulttyq zańnama talaptaryna sáıkes iske asyryldy. Jalpy, bizdiń mısıa 32 saılaý ýchaskesine bardy. Biz tıisti monıtorıń júrgizdik jáne onyń barysynda eleýli kemshilikter bolǵan joq. Atap aıtqanda, saılaýdy uıymdastyrý men ótkizý zań talaptary aıasynda ótti», - dedi Sadı Djafarov.