14 naýryz kúni elordada Bas múftı Naýryzbaı qajy Taǵanuly BAQ ókilderiniń qatysýymen baspasóz máslıhatyn ótkizdi. Atalmysh baspasóz máslıhatynda bıyl Ramazan aıy 23 naýryzda bastalyp, 21 sáýirde aıaqtalatyndyǵy jarıalady. Sáýirdiń 17-nen 18-ne qaraǵan tún – Qadir túni. 21 sáýir – oraza aıt merekesi. Bıyl pitir sadaqa mólsheri 535 teńge bolyp bekitildi, dep habarlaıdy almaty-akshamy.kz
Shaǵban aıynyń sońǵy kúni Paıǵambarymyzdyń (s.ǵ.s) musylman jurtshylyǵyna aıtqan nasıhatynda: «Ýa, adamdar! Senderge ulyq, berekeli aı kelip jetti. Bul aıda myń aıdan artyq Qadir túni bar. Alla osy aıda oraza tutýdy paryz etti, al túnderindegi namazdy qosymsha qulshylyq etti... ...Ramazanda Allaǵa bir izgi qasıetpen jaqyndaǵan jan basqa ýaqytta paryz amalyn oryndaǵanǵa teń. Al, paryz amalyn oryndaǵan adam basqa ýaqytta jetpis paryzdy atqarǵandaı (saýap ıelenedi). Bul – sabyrlyq aıy. Al sabyrdyń syıy – jánnat. Ramazan – ózara janashyrlyq aıy. Oraza aıynda múminniń yrzyq-nesibesi eselenedi...», - dep súıinshileıdi.
Ramazan – tıylý aıy. Jep-ishýden ǵana emes, kúná ataýlydan, jamandyqtan tıylý maýsymy. Ásili, kúni boıy ash júrip oraza ustaý qıyn emes. Eń qıyny on eki múshemizge oraza ustatý. Hadıste: «Kimde-kim jaman sózi men jaman is-áreketten tıylmasa, onyń tamaq jeýden jáne sýsyn ishýden tıylǵany Alla Taǵalaǵa eshbir keregi joq», - degen. Demek, dene-múshelerimizdi teris is-áreketten tyıý oraza talaptarynyń biri.
Bas múftı úndeýine ún qosý
Elimizdiń Bas múftıi Naýryzbaı qajy Taǵanuly hazret kásipker azamattardy, saýda ortalyqtarynyń basshylaryn qasıetti aıdyń qurmeti úshin halqymyzdyń turmys jaǵdaıyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetip, jeńildik jasaýǵa shaqyrǵan úndeýine almatylyq kásipkerlerdi ún qosýǵa shaqyramyn. Halqymyzda: «Qaıyrymdylyq jasasań – qaıyryn óziń kóresiń», - degen danalyq bar. Paıǵambarymyz Muhammed (oǵan Allanyń salaýaty men sálemi bolsyn): «Kimde-kim baýyrynyń qajetin ótese, Alla onyń qajetinde bolady. Kimde-kim musylmannyń bir qaıǵysyn seıiltse, Alla onyń qaıǵy-qasiretteriniń birin seıiltedi», – degen.
Osy sátti paıdalanyp, barsha qaýymǵa qasıetti Ramazan aıynda araq-sharap ishilmese jáne dúkenderde satylmasa, múmkindiginshe qudaıy astar keshki aýyzashar ýaqytynda ótkizilse degen tilegimizdi jetkizemin. Alla Taǵala Ramazannyń qurmeti úshin jasaǵan jaqsy isimizdiń sebebimen barshamyzdy jaqsylyqqa keneltkeı.
Ramazan daıyndyǵy
Almaty meshitterinde qasıetti Ramazan aıyn atap ótý úshin arnaıy jospar bekitildi. Oraza aıyna qaladaǵy barlyq meshittiń daıyndyǵy pysyqtaldy. Bıyl qaladaǵy 54 meshittiń 50-inde taraýıh namazynda quran hatym túsiriledi. Qalǵan 4 meshitte, atap aıtsaq:
- Medeý aýdany «Ismıhan» meshiti
- Naýryzbaı aýdany «Kúlıza ana» meshiti
- Túrksib aýdany «Makka» meshiti
- Túrksib aýdany «Ar-Rahım» meshitinde taraýıh namazy quran hatymsyz oqylady.
Almaty ortalyq meshitinde «Ramazan shatyry» qurylyp, kúndelikti 500 kisige aýyzashar dastarhany jaıylmaq. Sondaı-aq, qala meshitterinde de aýyzashar beriledi. Aýyzashar bergisi keletin kisiler meshitterdegi jaýapty mamandarǵa jolyǵýlaryna bolady. (Baılanys tel.: 8 708 905 66 85).
Aqparattyq-nasıhat jumystary
Bıylǵy jyldy QMDB «Islam jáne İzgi qoǵam» jyly dep jarıalaǵandyqtan oraza aıynda «Ramazan – izgilik aıy» aıasynda túrli sharalar (kezdesý, semınar, dóńgelek ústel, suhbat, ýaǵyz-nasıhat, qaıyrymdylyq t.b.) uıymdastyrylmaq.
Sondaı-aq, Almaty turǵyndary arasynda «Jarapazan-Party» baıqaýyn jarıaladyq. Maqsat – oraza aıynda din men dástúrdiń sabaqtastyǵyn dáriptep, kenjelep qalǵan dástúrimizdi jańǵyrtý bolyp tabylady.
Orazanyń alǵashqy kúnderi qala meshitterinde «Orazaǵa qatysty saýaldarǵa jaýap berý alańy» degen atpen jamaǵattyń dinı suraqtaryna jaýap berý sharasy ótkiziledi. Almaty ókildigi «Orazaǵa qatysty 200 suraq» atty kitapshany «Muftyat» baspasynan shyǵaryp, meshitterde 10 000 tırajben jáne 20 000 tırajben oraza kestesi tegin taratylmaq.
Almaty ókildigine qarasty «azan.kz» saıtyna bir kúnde 20 myńnan astam oqyrman kiredi. Al, Ramazan aıynda orazaǵa qatysty málimet izdeýshiler sany 50 myńnan asyp jyǵylady. Saıtqa bir mezette kirýshilerdiń kóptiginen saıt jumysy toqtap qalatyn kezderi de bolady. Sol sebepti, «azan.kz/ kz/ramadan» paraqshasyn qazaq-orys tilderinde qosymsha usynylyp otyr.
Call ortalyq
Orazaǵa, jalpy dinı máselege qatysty qandaı da suraqtar bolsa Qazaqstan musylmandary dinı basqarmasy janynan ashylǵan Dinı aqparat berý ortalyǵynan jaýap alýǵa bolatyndyǵyn habarlaımyz. Ortalyq nómiri – 8 (7172) 33-30-30. Sondaı-aq, Almaty ortalyq meshitine qarasty ortalyq nómeri 8 (727) 329 09 66, 8 700 719 76 22.
Ramazan dáristeri
Almaty Ortalyq meshitinde aptasyna bes kún besin namazynan keıin orazaǵa qatysty taqyryptarda dáris júrgiziledi. Ramazan quran aıy. Sol sebepti, osy aıda qala meshitterinde quran álippesi men namaz úıretý kýrstary júrgiziledi.
Sonymen qatar qala meshitterinde kúndelikti taraýıh namazynyń aldynda eldi yntymaq pen birlikke shaqyratyn tanymdyq ýaǵyzdar men orazanyń hıkmetteri jóninde dárister júrgiziletin bolady. Odan bólek «30 kúnge 30 ýaǵyz» jáne «Ramazan jáne Ihsan» taqyryptarynda vıdeo ýaǵyzdar oqyrmandarǵa usynylmaq. «Otbasyndaǵy ıhsan» taqyrybynda neke qıǵan jas-jubaılarǵa semınar ótkizý de josparǵa engizilip otyr. Nasıhat jumystaryna RANT pen JANT músheleri tartylatyn bolady.
Qaıyrymdylyq sharalary
Ramazan – qaıyrymdylyq aıy. Jaqsylyqtar eselenetin aı. Alla Elshisi (s.ǵ.s.) bir ósıetinde: «Sadaqanyń abzaly – Ramazan aıynda berilgen sadaqa», - dep súıinshileıdi. Almaty meshitterinde oraza aıynda «Sharapatty Ramazan», «Ramazan qorjyny», «Ramazan tábárigi» syndy aýqymdy qaıyrymdylyq is-sharalardy uıymdastyrý josparlanýda. Sonymen qatar «El úlesi páterge» jobasyn júzege asyrý da qolǵa alynbaq.